ԵՐԵՎԱՆ, 22 դեկտեմբերի — Sputnik. Հաղորդավար, դերասան, երաժիշտ Գարիկ Պապոյանը զարմացած է` ինչի՞ համար ենք մրցում Jingle Bells երգի հետ. Facebook սոցիալական ցանցի իր էջում նա այս մասին ասել է ուղիղ հեռարձակման ժամանակ։
Ավելի վաղ ՀՀ վարչապետ Նիկոլ Փաշինյանը Facebook սոցցանցի իր էջի ուղիղ եթերով ասել էր, որ հանձնարարել է Ամանորի երգ գրել, որը պետք է ավելի հայտնի դառնա, քան Jingle Bells–ը։ Նա տեղեկացրել էր, որ մեկ երգ արդեն գրել են։ Երևանի փոխքաղաքապետ Տիգրան Վիրաբյանն իր հերթին հայտնել էր, որ երգը գրել են Գարիկ Պապոյանն ու Ավետ Բարսեղյանը, իսկ կկատարի այն երգչուհի Սոնա Ռուբենյանը։
«Որևէ մեկին չես կարող հանձնարարել, որ համաշխարհային հիթ ստեղծի, քանի որ այն չեն ստեղծում. հիթը ֆենոմեն է, դա պահի տակ կամ սիրվում է, կամ չի սիրվում: Երևանի փոխքաղաքապետ Տիգրան Վիրաբյանն ուղղակի վերջերս ինձ զանգել ու Ամանորին նվիրված նոր երգ գրելու առաջարկ է արել, որի շուրջ էլ աշխատում ենք»,–ասում է Պապոյանը։
Նրա խոսքով` երգի առաջարկը ստանալուց հետո իրեն լրագրողներ են զանգել ու հետաքրքրվել` կհաջողվի հաղթել «Jingle Bells»-ին: Իսկ երբ Պապոյանը հետաքրքրվել է` ինչի՞ մասին է խոսքը, լրագրողները ասել են, որ վարչապետը հանձնարարել է համաշխարհային հիթ ստեղծել, որը կհաղթի Jingle Bells-ին:
Պապոյանը հետո նայել է Փաշինյանի ելույթն ու հասկացել` ինչի մասին է խոսքը։ «Մարդ է, երազում է, ու շատ լավ բան է երազում: Ասում է, որ եթե ամեն տարի աշխատենք, նոր երգեր ստեղծենք, մի օր միգուցե կարողանանք մրցել Jingle Bells-ի հետ: Սակայն դա չի նշանակում, որ ինձ հանձնարարել են մրցել Jingle Bells–ի հետ»,–ասում է Պապոյանը:
Սոնա Ռուբենյանը մի հատված է երգում Jingle Bells–ին «ձեռնոց նետած» երգից
Երաժշտի խոսքով` իրենց գրած երգը դեռ պատրաստ չէ, բայց մարդիկ արդեն գնահատականներ են տալիս, թե` «ապուշություն» է։ Պապոյանը նշում է, որ իրականում երգն իր, Սոնա Ռուբենյանի և Ավետ Բարսեղյանի հերթական նոր երգն է, որը վախենում են հրապարակել, քանի որ սպասելիքները շատ մեծ են երգից։
Հիշեցնենք, որ Sputnik Արմենիայի հետ զրույցում Պապոյանը հայտնել էր, որ ծրագրում է երգի վրա արվելիք աշխատանքներն ավարտել դեկտեմբերի 20-21–ին և Ամանորի գիշերը ներկայացնել այն ունկնդրին։