Դավիթ Խաժակյանը Sputnik Արմենիայի եթերում ներկայացրել է քաղաքապետարանի պաշտոնատար անձանց կեղծած փաստաղթերի պատմությունը և պատմել, թե ինչպես են իր մոտ հայտնվել վերոհիշյալ փաստաթղթերը:
Երևանի ավագանու «Լույս» խմբակցության ղեկավարը Գլխավոր դատախազությանն արդեն իսկ հանցագործության մասին հաղորդում է ներկայացրել, ըստ որի՝ հոկտեմբերի 22-ից նոյեմբերի 8-ը Հայկ Մարությանը գտնվել է արձակուրդում, այդ ընթացքում նրա լիազորությունները զբաղեցրել է քաղաքապետի առաջին տեղակալ Հրաչյա Սարգսյանը, բայց քաղաքապետի որոշմամբ` Սարգսյանը նոյեմբերի 5-ից 13-ը գործուղվել է արտասահման։
«Բռնվեցի՞ք, ժողովուրդ ջան, սա այն փաստաթուղթն է, որը դուք փոխել եք».Դավիթ Խաժակյան
Հրաչյա Սարգսյանին փոխարինել է քաղաքապետի մյուս տեղակալ Հայկ Սարգսյանը, ով հիշյալ ժամանակահատվածում ավելի քան 7 տասնյակ փաստաթղթեր է ստորագրել` չունենալով այդ լիազորությունները։
Դավիթ խաժակյանը նշում է, որ «Լուսավոր Հայաստան» կուսակցության նախագահ, ԱԺ պատգամավոր Էդմոն Մարուքյանի արձագանքն իրեն ավագանուց հետ կանչելու նպատակահարմարության հարցը քննարկելու վերաբերյալ, անակնկալ չէր:
«Ավագանուց հետ կանչվելու դեպքում շարունակելու եմ ուշադրությունս կենտրոնացնել քաղաքային իշխանության վրա: Ինչ կարգավիճակ էլ ունենամ, նման «ճոխություն» թույլ չեմ տա քաղաքային իշխանությանը, հետևողականորեն շարունակելու եմ նույն գիծն ու զբաղվելու եմ քաղաքական գործունեությամբ»,- ասում է ավագանու «Լույս» խմբակցության ղեկավարը:
Դավիթ Խաժակյանի համոզմամբ՝ Երևանի ավագանիում փոխզսպումը և հակակշռումն ընդդիմության կողմից պետք է ամուր լինի:
Երևանի քաղաքապետարանը ձնամաքրման համար նոր տեխնիկան ձեռք է բերել առանց մրցույթի. Խաժակյան
Հիշեցնենք, որ Դավիթ Խաժակյանը Երևանի ավագանու կազմում ղեկավարում է ընդդիմադիր «Լույս» խմբակցությունը, որում ընդգրկված են «Լուսավոր Հայաստան» և «Հանրապետություն» կուսակցությունների անդամները: