ԵՐԵՎԱՆ, 17 դեկտեմբերի — Sputnik, Արմենուհի Մխոյան. Գյումրու անօթևան ընտանիքներից 11–ն արդեն բնակարան ունեն։ Քաղաքապետարանի և ԱՌԴԱ բարեգործական հիմնադրամի նախաձեռնությամբ իրականացրած ծրագրի շրջանակներում շահագործման հանձնված 18 սոցիալական բնակարանից 11-ի շահառուներն այսօր վիճակահանությամբ ընտրեցին իրենց կացարանները: 8 հատ 1 սենյականոց և 3 հատ 2 սենյականոց բնակարան վիճակահանվեց: Հանձնաժողովի որոշմամբ` վիճակահանությունը կատարվեց առաջին և երկրորդ հարկերի բնակարանների համար:
ԱՌԴԱ-ի կառուցած 18 բնակարանից 7-ը, սակայն, չունեցան տեր: Տնակներում կամ ժամանակավոր այլ կացարաններում բնակվող անօթևանները դիմումներ չէին ներկայացրել: Եղավ ենթադրություն, որ պատճառն առաջիկայում Գյումրիում իրականացվելիք ԲԳՎ(բնակարանների գնման վկայական) ծրագիրն է:
«Կարծում եմ, որ կառավարության ձեռնարկած միջոցառումն է պատճառը, որ 7 բնակարան մնաց: Մարդիկ գերադասում ունենալ սեփական, ոչ թե սոցիալական բնակարան: Սոցիալական բնակարանի միակ տարբերությունը սեփականության իրավունք չունենալն է, բայց քանի ապրում են այդ բնակարանում, դա իրենցն է»,-ասաց ԱՌԴԱ բարեգործական հիմնադրամի գործադիր տնօրեն Հրահատ Ստեփանյանը:
Քաղաքապետ Սամվել Բալասանյանը հանձնարարեց չափորոշիչներում փոփոխություններ կատարել, որպեսզի հունվարից նոր դիմումներ ստացվեն, և ազատ մնացած այդ 7 բնակարաններն էլ հանձնվեն գյումրեցի անօթևաններին:
Երկրաշարժից տուժած 226 ընտանիք բնակարան կունենան, բայց տնակների խնդիրը դեռ չի լուծվի
Ի դեպ, այս սոցիալական բնակարաններն ապահոված են ջեռուցման համակարգով, խոհանոցն ամբողջովին կահավորված է, կա գազօջախով, սանհանգույցները ևս ունեն համապատասխան կահավորում: ԱՌԴԱ-ն ամբողջովին հոգում է բոլոր բնակիչների ջեռուցման ծախսը: Նախորդ երկու փուլերում շահագործված բնակարանների պարագայում էլ այս պարտավորությունն անխախտ է եղել:
Հավելենք, որ հաջորդ տարի ԱՌԴԱ-ն ևս շինարարություն կիրականացնի։ Արդեն շահագործված շենքերի տարածքի մերձակա հատվածում քաղաքապետարանի առաջարկով մանկապարտեզ և մարզամշակութային հաստատություն կհիմնվի: Ընկերությունն արդեն տարածքի ուսումնասիրությունը սկսել է:
Աղետի գոտու 227 ընտանիք բնակարան գնելու հնարավորություն կստանան
Ընդհանուր առմամբ ԱՌԴԱ-ն անցնող 3 տարում Գյումրիում 41 բնակարան է հանձնել շահագործման, այսինքն` 41 ընտանիք տնակից քարաշեն բնակարան է տեղափոխվել: