ԵՐԵՎԱՆ, 17 դեկտեմբերի — Sputnik. Երևանի նախկին քաղաքապետն առանձնապես խոշոր չափի կաշառք է ստացել շինարարական թույլտվություն տալու համար։ Այս մասին հայտնում է Ազգային անվտանգության ծառայության պաշտոնական կայքը։
«2009թ. Երևանի քաղաքապետը նախ քաղաքում բազմաբնակարան շենք կառուցապատող կազմակերպության հիմնադիրի օգտին գործողություններ է կատարել, կասեցված շինարարության վերսկսման հետ կապված խոչընդոտները վերացրել ու հարկայնությունն ավելացնելու թուլտվություն է տվել»,–նշված է հաղորդագրության մեջ։
Հայաստանում խաբել են ՌԴ–ի և Ղազախստանի քաղաքացիներին. ԱԱԾ–ի նոր բացահայտումը
Այդ ամենի համար Երևանի քաղաքապետն իր եղբոր միջնորդությամբ 2009 թ. ընթացքում մաս-մաս, այդ թվում նաև քաղաքապետարանի պաշտոնատար անձանց միջոցով, ստացել է առանձնապես խոշոր՝ 75 000 ԱՄՆ դոլարի չափով կաշառք։ Ավելին, խնդիրներին վերջնական լուծում տալու նպատակով պահանջել է նաև կառուցվող շենքում Երևանի քաղաքապետարանի կարիքների համար հատկացնել 200 մ² մակերեսով բնակարան:
ՀՀ քրեական օրենսգրքի համապատասխան հոդվածով առերևույթ հանցագործության դեպքի առթիվ ՀՀ ԱԱԾ քննչական դեպարտամենտում հարուցվել է քրեական գործ, կատարվում է նախաքննություն:
Հիշեցնենք, որ 2009թ.–ին մինչև մարտի 4–ը Երևանի քաղաքապետ է եղել Երվանդ Զախարյանը, իսկ մարտի 4–ից սկսած` Գագիկ Բեգլարյանը։
Սեպտեմբերի 28–ին ՀՔԾ–ն հայտնեց, որ Զախարյանի դեմ քրեական գործ է հարուցվել և մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով, այն է` պաշտոնեական լիազորությունները չարաշահելը։
Պարզվել էր, որ Երևանի գլխավոր հատակագծով հասարակական նշանակության կանաչ տարածքների գոտում ներառված, «Հաղթանակ զբոսայգու» մաս կազմող և Երևանի Ազատության պողոտա 2/5 հասցեում գտնվող 10.000քմ հողատարածքը Երևանի քաղաքապետի 12.03.2008թ. որոշմամբ, վերոնշյալ զբոսայգու զբաղեցրած տարածքի վերաճշտման պատրվակով թողարկված նոր հատակագծով, ապօրինի կերպով դուրս է թողնվել զբոսայգու տարածքից:
Երևանի նախկին քաղաքապետին մեղադրանք է առաջադրվել. ՀՔԾ
Այնուհետև Երևանի քաղաքապետի կայացված մեկ այլ՝ 08.04.2008թ. որոշմամբ ` օտարման ոչ ենթակա վերը նշված հողատարածքը կադաստրային արժեքով` 164.760.000 դրամով /այսինքն` 1քմ-ն ընդամենը 16.476 ՀՀ դրամով/, ուղղակի վաճառքի միջոցով օտարվել է «Գոլդեն Փելես» Հյուրանոց» ՍՊԸ–ին։