Հայոց ցեղասպանության 105-րդ տարելիցին «Դարի ղողանջ» բարեգործական հիմնադրամի նախաձեռնությամբ նախատեսվում է Ծիծեռնակաբերդի բարձունքում դեպի անմար կրակ տանող ճանապարհի երկու կողմում տեղադրել 105 ռոյալ: Ցեղասպանության բանաձևը ԱՄՆ սենատում ընդունելուց հետո մեկնարկեց «105 ռոյալ» նախագծի չելենջը՝ «Ոչ ցեղասպանություններին» կոչով, ինչի արդյունքում հանգանակված գումարով պետք է գնվեն 105 ռոյալները:
Արթուր Հովհաննիսյանի փոխանցմամբ՝ արդեն ստույգ պայմանավորվածություններ կան կոնկրետ անձանց հետ, և շատերն են ուզում մասնակցել ակցիային:
«Չելենջը սկսեցինք, որովհետև արձանագրեցինք ևս մեկ հաղթանակ` Սենատը կրկին բարձրացրել է այդ թեման, իսկ մեր նախագիծը, մեր համոզմամբ, կարող է լինել շատ ուժեղ լեյտմոտիվ Հայոց ցեղասպանության ընդունման հարցում»,–ասաց Հովհաննիսյանը` տեղեկացնելով, որ կոմպոզիտոր Տիգրան Մանսուրյանն առաջինն է միացել նրանց՝ ասելով, որ շատ լավ մտահղացում է: Մի ռոյալ էլ անվանակոչվելու է նրա անունով:
«Ապրիլի 24-ին մենք պետք է ցույց տանք մեր հզորությունը, ցույց տանք, թե ինչպես ենք խոնարհվում մեր սուրբ նահատակների հիշատակի առջև, ինչպես ենք ամուր կանգնած մեր ոտքերի վրա` նաև երաժշտական առումով ու մտածում ենք մեր ապագա Կոմիտասների, Խաչատրյանների, Բաբաջանյանների մասին՝ նվիրելով նրանց այդպիսի հրաշալի ռոյալներ»- ասում է Արթուր Հովհաննիսյանը:
«Ծափահարում եմ Սենատի որոշմանը»․ նախագահի թեկնածու Բայդենը` Ցեղասպանության բանաձևի մասին
Հայտնիներից նախաձեռնությանը մասնակցելու ցանկություն են հայտնել Ռոբերտ Մլքեյանը, Սերժ Թանկյանը, Էդուարդ Թոփչյանը, Սերգեյ Սմբատյանը, նաև անվանի մարզիկներ:
«105 ռոյալ» ծրագրի հաջողության դեպքում՝ այդ օրը աշխարհի տարբեր երկրներից Հայաստան ժամանած հարյուրհինգ երաժիշտ կկատարի հայ կոմպոզիտորների ստեղծագործությունները՝ սիմֆոնիկ նվագախմբի նվագակցությամբ: Ռոյալների վրա գրվելու է նվիրատուների անունները: Նախագծի իրականացումից հետո ռոյալները կնվիրվեն Հայաստանի ու Արցախի տարբեր քաղաքների ու գյուղերի երաժշտական դպրոցներին: