ԵՐԵՎԱՆ, 11 դեկտեմբերի — Sputnik. Արարատի մարզպետ Գարիկ Սարգսյանի պաշտոնանկության հարցը, որն ամիսներ շարունակ շրջանառվում է, հնարավոր է, որ շուտով ավելի առարկայական դառնա։ Այս մասին գրում է «Հրապարակ» թերթը.
«Վերջերս մարզպետի օգնական է նշանակվել «Քաղաքացիական պայմանագիր» կուսակցության Արարատի տարածքային կառույցի պատասխանատու Կառլեն Մկրտչյանը, որն «ուսումնառության» շրջան է անցնում»,–գրում է թերթը։
Համապատասխան պատրաստման դեպքում հնարավոր է` նա Գարիկ Սարգսյանի փոխարեն նշանակվի մարզպետի պաշտոնում։
Հիշեցնենք, որ Արարատի մարզպետի շուրջ աղմուկ բարձրացավ այն բանից հետո, երբ նա հավանություն էր տվել Դաշտավան գյուղում մի ներդրողի` կոկորդիլոսաբուծարան հիմնելու մտադրությանը:
Մաքսայինում հնարավոր չէր եղել տարանջատել՝ կոկորդիլոսը թռչո՞ւն է, թե ոչ: Քանի որ կոկորդիլոսի ձվի ներմուծման մաքսային կոդ չկա, ուստի այն պետք է ներմուծվեր թռչնի ձվի անվան տակ:
«Հարցն այն է եղել, թե կոկորդիլոսների նախնիներն ավելի շատ կենդանիների որ խմբին են պատկանել: Կոկորդիլոսն իր կառուցվածքով մոտ է թռչուններին: Նա չունի ստամոքս, ունի քարաճիկ, պատկերացնո՞ւմ եք: Ինչ-որ ժամանակ նրանք թռել են»,-լրագրողների հետ ճեպազրույցում ասել էր Սարգսյանը:
Այժմ էլ, համացանցային տիրույթում, ծիծաղով են վերհիշում մարզպետի` կոկորդիլոսների հետ կապված պատմությունը:
Վերջերս էլ Արարատի մարզպետ Գարիկ Սարգսյանի անվան շուրջ աղմուկ բարձրացավ այն բանից հետո, երբ 168.am-ը գրեց, որ մարզպետի եղբայրը ծեծել է վարսավիրին, որը հերթից դուրս հրաժարվել է սպասարկել մարզպետին։ Վարսավիր Սերոբը լրատվամիջոցի հետ զրույցում չի հերքել տեղեկությունը, բայց մանրամասներ էլ չի հայտնել։
Մարզպետ Գարիկ Սարգսյանը հերքում է վարսավիրին ծեծելու լուրը
«Հայտարարում եմ, որ դա ապատեղեկատվություն է։ Եվս մեկ անգամ տվյալ լրատվամիջոցին և իրենցից արտատպած մյուս լրատվականներին հորդորում եմ որևէ նյութ գրելուց առաջ ճշտել դրա իսկությունը»,–Facebook սոցիալական ցանցի իր էջում գրել էր նա։
Սարգսյանը նյութի կապակցությամբ հրավիրել էր իրավապահ մարմինների ուշադրությունը և խնդրել, որպեսզի մանրամասն ուսումնասիրեն տվյալ նյութը։ Եվ եթե դրանում հանցակազմ պարունակող հատկանիշներ կան, ապա թող անհապաղ միջոցներ ձեռնարկեն՝ պարզելու տվյալ «դեպքի հանգամանքները» և մարզպետին մեղսագրվող «հանցանքի» արժանահավատությունը։