ԵՐԵՎԱՆ, 9 դեկտեմբերի — Sputnik. Հարյուրամյակի ամենացուրտ դեկտեմբերը Հայաստանում դիտվել է 1953թ-ին։ Այս տեղեկությունը Facebook-ի իր էջում գրել է ՀՀ ԱԻՆ «Հիդրոմետ» ծառայության պետ Գագիկ Սուրենյանը` ի մխիթարություն մրսկանների և ցրտից բողոքողների։
Ձմեռը չի շտապում գալ. ի՞նչ եղանակ է սպասվում
«Հատկապես Արարատյան դաշտում օդի ամսական միջին ջերմաստիճանը նորմայից ցածր է եղել 10-12 աստիճանով, իսկ գիշերային ժամերին ամսվա վերջին օրերին ջերմաստիճանը նվազել է մինչև -30 աստիճան ցրտի։ Հարգելի մրսկաններ, բա որ նման բան լիներ դուք ի՞նչ էիք անելու»,–հարցրել է Սուրենյանը։
Իսկ ավելի վաղ Սուրենյանն իր էջում լուսանկար էր հրապարակել, որին կից «արդարացել» էր. «Ուզում եմ փոխել արևի վրա, բայց կնոպկան փչացել է»։
Հիշեցնենք, որ դեկտեմբերի 9–ին «Հիդրոմետ» ծառայության պետ Գագիկ Սուրենյանը գրել էր, որ մեր տարածաշրջանը դեռ տևական ժամանակ գտնվելու է հարավարևմտյան տաք օդային զանգվածների տիրապետման գոտում։
Ցուրտ օդային հոսանքները մինչև դեկտեմբերի 20-ը դժվար թե ներաթափանցեն Հայաստան: