ԵՐԵՎԱՆ, 4 դեկտեմբերի — Sputnik. Մի զինծառայողի մահվան և մյուսի վիրավորում ստանալու գործով կատարվել են մի շարք անհետաձգելի և անհրաժեշտ քննչական գործողություններ, այդ թվում` մարտական դիրքի տեսախցիկների տեսագրությունների փորձաքննություն: Այս մասին հայտնում է ՀՀ քննչական կոմիտեն։
Ինչպես արդեն տեղեկացրել էինք, 2019թ. դեկտեմբերի 2-ին՝ ժամը 06:50-ի սահմաններում, ՊԲ N զորամասի պահպանության տեղամասի մարտական դիրքում պարտադիր ժամկետային զինծառայող Արթուր Իշխանի Աջամյանի մահացու հրազենային վիրավորում ստանալու, իսկ պարտադիր ժամկետային զինծառայող Դավիթ Հարությունի Մելիքբեկյանի հրազենային վիրավորումներ ստանալու դեպքի առթիվ ՀՀ քրեական օրենսգրքի 34-104-րդ հոդվածի 2-րդ մասի 1-ին կետով (երկու կամ ավելի անձանց սպանության փորձ) հարուցվել է քրեական գործ, կատարվում է նախաքննություն:
Քրեական գործով կատարվել է դեպքի վայրի զննություն, դիակի արտաքին զննում, նշանակվել են դիակի, ինչպես նաև` Դ.Մելիքբեկյանի վերաբերյալ դատաբժշկական փորձաքննություններ։ Մի շարք զինծառայողներ հարցաքննվել են որպես վկա, տուժող Ա.Աջամյանի պապը՝ Խատիֆ Աջամյանը, ճանաչվել է տուժողի իրավահաջորդ և հարցաքննվել, փաստաբաններ Հայարփի Սարգսյանը և Խաչատուր Ստեփանյանը ճանաչվել են տուժողի իրավահաջորդի ներկայացուցիչներ և մասնակցել են դիակի դատաբժշկական փորձաքննությանը։
ԱԺ–ի մոտ կազմակերպված բողոքի ակցիան ավարտվեց. զինվորի հարազատները հավատացին Քոչարյանին
Ինչպես նաև վերցվել են մարտական դիրքի տեսախցիկների տեսագրությունները, միջնորդություններ են հարուցվել դատարան՝ Ա.Աջամյանի հեռախոսային միացումների վերծանման և նրա բջջային հեռախոսը զննելու վերաբերյալ, նշանակվել է դատաձգաբանական փորձաքննություն։
Քրեական գործով նախաքննությունը շարունակվում է:
Հիշեցնենք, որ այսօր Արթուր Աջամյանի հարազատները հավաքվել էին ԱԺ–ի դիմաց և պնդում էին իրենց որդուն որպես ինքնասպան չպիտակավորել։ Նրանց խոսքով` եթե կա երկրորդ վիրավոր, ինքնասպանություն լինել չի կարող։