ԵՐԵՎԱՆ, 30 նոյեմբերի - Sputnik. Երևանի ավագանու «Լույս» խմբակցության անդամ Թեհմինա Վարդանյանը Facebook-ում գրառում է արել և հայտնել՝ հստակ տեղեկություններ ունի, որ 2019թ.–ի սեպտեմբերին քաղաքապետարանի կողմից «Ջերմուկ գրուպ» ընկերությանը տրվել են Արշակունյաց 18, 18/4, 18/5 և 18/10 հասցեներում շինարարական աշխատանքներ իրականացնելու թույլտվություններ։ Փոխարենն ընկերությունը 5 ձնամաքրման մեքենա է նվիրել քաղաքապետարանին։
«Մենք մինչ այս խոսում էինք աղբատար մեքենաների մասին, բայց արի ու տես, որ սա դեռ ամենը չէ։ Էլ ի՞նչ սպասենք ձեզանից, պարոնայք։ Սա համապատասխանո՞ւմ է իրականությանը։ 4 բազմաբնակարան շենքի կառուցման թույլտվություն - 5 ձնամաքրման մեքենա»,– գրել է ավագանու անդամը։
Վարդանյանը խոստացել է, որ այսուհետ յուրաքանչյուր շինթույլտվություն անցնելու է խոշորացույցի տակով, քանի որ ըստ նրա` վերջին զարգացումները ցույց տվեցին, որ պետք չէ վստահել ընտրված քաղաքապետին։
«ԿամԱԶ»–ների գնման մեջ գումա՞ր են աշխատել. Երևանի քաղաքապետարանի պարզաբանումը
Ավագանու անդամը նաև հայտնել է, որ երկուշաբթի հարցում է ուղարկելու քաղաքապետին և պահանջելու է վերոհիշյալ շինթույլտվությունները։
Հիշեցնենք` «Լույս» խմբակցության ղեկավար Դավիթ Խաժակյանն ավելի վաղ հայտնել էր, որ գործող իշխանությունը խոշոր գործարար Սամվել Ալեքսանյանին այլևս չի ընդունում որպես նախկին «հանրապետական գործարարի», ուստի ավելի քան հստակ է, որ հենց Ալեքսանյանն է քաղաքին նվիրաբերել երկու տասնյակ «ԿամԱԶ»-ները: Դրան հաջորդել էր քաղաքապետի մամուլի խոսնակ Հակոբ Կարապետյանի հերքումը` քաղաքապետարանը Սամվել Ալեքսանյանից առհասարակ նվեր չի ստացել։
Երևանի քաղաքապետարանին «ԿամԱԶ» նվիրողների ցանկում է նաև «Ալեքս ընդ հոլդինգը»
Ավելի ուշ Կարապետյանը հրապարակել էր քաղաքապետարանին տրված նվիրատվությունների ցանկը, ըստ որի` «Ալեքս ընդ հոլդինգ» ՍՊԸ–ն 3 «ԿամԱԶ» է նվիրել քաղաքապետարանին։ Բացի «Ալեքս ընդ հոլդինգ» ՍՊԸ–ից, քաղաքապետարանին նվիրաբերություններ են կատարել Սարգիս Խուրշուդյանը և Հայրապետ Հովհաննիսյանը` նվիրելով 3 հատ ֆուրգոն, «Ն և Ս Քոնսթրաքշն ՍՊԸ–ն` 14 «ԿամԱԶ», ՀՀ–ում Չինաստանի Ժողովրդական Հանրապետության դեսպանությունը` 1 «ԿամԱԶ», «Էյչ բի Էմ գրուպը»` 1 «ԿամԱԶ»։