ԵՐԵՎԱՆ, 30 նոյեմբերի — Sputnik. Երեկ դժբախտ դեպք է տեղի ունեցել Տավուշի մարզում։ Իջևանի անտառտնտեսության Գանձաքարի մասնաճյուղի տարածքից Իջևանի հիվանդանոց է տեղափոխվել 28-ամյա երիտասարդի դի։ Sputnik Արմենիայի տեղեկություններով` մահացած երիտասարդը Գանձաքար գյուղից էր և անտառ էր գնացել ծառ կտրելու։
Այս տեղեկությունները Sputnik Արմենիայի հետ զրույցում հաստատեց նաև Գանձաքարի գյուղապետ Վարդգես Դովլաթբեկյանը։
«Գնացել էր, որ իրենց տան համար վառելափայտ բերեր ձմեռվա համար։ Կտրված ծառն ընկել է գլխին»,– ասաց գյուղապետը։
Երիտասարդն անտառում մենակ չի եղել։ Ըստ գյուղապետի` տղան հարևաններից երկուսին խնդրել է, որ գնան, իրեն օգնեն։ Հենց նրանց աչքի առաջ էլ տեղի է ունեցել դեպքը։
Դովլաթբեկյանը հայտնեց, որ երիտասարդը ամուսնացած չէր։
Իջևանի հիվանդանոցից դեպքի մասին հայտնել են ոստիկանությանը։ Իրավապահները պարզում են դեպքի հանգամանքները։
Սարսափելի վթար Նորագավիթի սկզբնամասում. երիտասարդ վարորդը տեղում մահացել է