Sputnik Արմենիայի նկարահանող խումբը որոշեց շրջել քաղաքի խանութներում՝ օրվա տրամադրությունը որսալու համար։
«Երևան» մոլի մարքեթինգի բաժնի աշխատակից Ինգա Մուրադյանը մեզ հետ զրույցում նշեց, որ ժողովուրդը, ինչպես և ամեն տարի, ակտիվ է։ «Բավականին ակտիվ են ու հետաքրքրված, մշտական հաճախորդներն անգամ հարցնում են`«բա «Սև ուրբաթ» չե՞ք անելու, բա չի՞ լինելու»»,-պատմեց Ինգա Մուրադյանը։
Խանութներ շտապող գնորդների շրջանում անցկացրած հարցման արդյունքում պարզ դարձավ, որ մարդիկ անհամբերությամբ են սպասել այս օրվան և նույնիսկ գումար կուտակել։ «Իրականում անցած տարվանից եմ սպասում այս օրվան, որովհետև անցած տարի աշխատանքի էի ու չկարողացա օգտվել այս ամենից» - ասաց հարցման մասնակիցներից մեկը։
«Սև ուրբաթ» տերմինը ի հայտ է եկել ԱՄՆ-ում 1966թ.-ին. այն անցկացվում է Գոհաբանության օրվան հաջորդող ուրբաթ: Իսկ այդ օրը վաճառք կազմակերպելու սովորույթը առաջ է եկել 19-րդ դարում: «Սև ուրբաթը» ընկնում է նոյեմբերի 23-ից 29-ն ընկած ժամանակահատվածում: