Թեև Դավիթ Բաբայանը չի հանդիպել Ադրբեջանից ժամանած լրագրողներին, այդուհանդերձ, խոսելով Ստեփանակերտի առաջ քաշած ժողովուրդների միջև պատմական հաշտության թեզի կնքման մասին, նշում է, որ այդ հաշտության հասնելը փաստաթուղթ ստորագրելով չէ, այլ ժողովուրդները պետք է ներեն միմյանց։
«Այդ համատեքստում, առաջին հերթին դա պետք է անի Ադրբեջանի հասարակությունը, սակայն, ոչ թե պետք է ների, այլ պարզապես ընդունի, որ Արցախը գոյություն ունի, և դա Արցախի ժողովրդի անքակտելի իրավունքն է»,-շեշտում է Բաբայանը։
Ըստ Արցախի նախագահի մամուլի քարտուղարի, այդ քայլերին հասնելու համար պետք է կոտրվեն կարծրատիպերը, որոնք առաջացել են ադրբեջանական քարոզչության հետևանքով։
«Այդ կարծրատիպերը կոտրվում են, եթե կա ինչ-որ շփում կողմերի միջև, ու նմանատիպ այցելությունները կարող են իրենց դերակատարությունն ունենալ։ Չնայած, ինքս մի փոքր լավատես չեմ, քանի որ նախկինում էլ ադրբեջանական լրատվամիջոցների ներկայացուցիչներն այցելել են Արցախ, սակայն վերադառնալով Ադրբեջան՝ խեղաթյուրել են այստեղից վերցրած ամբողջ տեղեկությունները»,-հիշում է Դավիթ Բաբայանը։
Նա չի կարծում, որ մեկ-երկու այդպիսի շփումները կարող են ինչ-որ արմատական բան փոխել, բայց համարում է, որ կարելի է դիտարկել ժողովուրդների միջև կարծրատիպերը կոտրելուն ուղղված քայլ ու հետևել ապագայի զարգացումներին։
Ադրբեջանում լայնորեն տարածված է հայատյացությունը, և Եվրոպայում այդ մասին չգիտեն. Փաշինյան
Հիշեցնենք, նոյեմբերի 17-21-ը տեղի են ունեցել Հայաստանի և Ադրբեջանի լրագրողների փոխայցելություններ։ Հայաստանի և Արցախի լրատվամիջոցների ներկայացուցիչներն այցելել են Ադրբեջան, իսկ ադրբեջանցի լրագրողները՝ Հայաստան և Արցախ: Ծրագիրը նախապատրաստվել ու կյանքի է կոչվել ԵԱՀԿ-ի գործող նախագահի անձնական ներկայացուցիչ Անջեյ Կասպրշիկի համակարգմամբ` Հայաստանի, Արցախի և Ադրբեջանի համապատասխան գերատեսչությունների ներգրավմամբ։ Հայաստանից և Արցախից Ադրբեջան էին այցելել Արցախի հանրային հեռուստաընկերության մեկնաբան Էդգար Էլբակյանը, «Շանթ» հեռուստաընկերության մեկնաբան Արտյոմ Երկանյանն ու «Մեդիամաքս» լրատվական գործակալության համահիմնադիր, գլխավոր խմբագիր Դավիթ Ալավերդյանը։
Դա վտանգավոր է. Հայաստանի ԱԳՆ–ն պատասխանել է Ալիևի սումգայիթյան ելույթին