ԵՐԵՎԱՆ, 12 նոյեմբերի — Sputnik. Պետական համակարգի կրճատված աշխատակիցները վարչապետի աշխատակազմի դեմ դիմել են դատարան`պահանջելով վերականգնել իրենց նախկին աշխատատեղում։ Այս մասին հայտնում է «Ժողովուրդ» թերթը։
Պարբերականի տեղեկություններով` նոյեմբերի 7-ին դատարան է դիմել Գրետա Մելքոնյանը` պահանջելով ոչ միայն վերականգնել իրեն նախկին աշխատավայրում, այլև վարչապետի աշխատակազմից բռնագանձել հարկադիր պարապուրդի գումարը` իր միջին աշխատավարձի չափով:
«Հոկտեմբերի 11-ին էլ ՀՀ վարչական դատարան է դիմել Ռոզա Սահակյանը և հայց ներկայացրել աշխատակազմի դեմ: Մասնավորապես, Սահակյանն իր հայցով պահանջում է, որ դատարանը պարտավորեցնի աշխատակազմին 2019 թվականի օգոստոսի 5-ի՝ իրեն պաշտոնից ազատելու մասին հրամանն անվավեր ճանաչել, որպես անվավերության հետևանք իրեն զբաղեցրած պաշտոնում վերականգնել ու դեռ ավելին` հայցվորի օգտին հարկադիր պարապուրդի ամբողջ ժամանակահատվածի համար միջին աշխատավարձ բռնագանձել»,– գրում է «Ժողովուրդ» օրաթերթը։
Նույն պահանջով, ըստ թերթի, արդեն դատարան են դիմել նաև Արփինե Բաղդասարյանը, Լուսինե Բասենցյանը, Կարինե Բաբաջանյանը, Մարգարիտա Պետրոսյանը, Սիլվա Ղազարյանը։
Հիշեցնենք` Sputnik Արմենիան անդրադարձել է պետական համակարգում օպտիմալացման խնդրին։ Մեր գրավոր հարցմանը 12 նախարարություններից պատասխանել են 4-ը։
Ոչ բոլոր նախարարների ու փոխնախարարների աշխատավարձերն են բարձրացել, կան նաև նվազումներ
Ըստ այդ պատասխանների` ՀՀ արդարադատության նախարարությունում օպտիմալացման ամբողջ պրոցեսի ընթացքում` 2019-20թթ–ին կրճատվելու է 5 աշխատակից, ԿԳՄՍ նախարարության կազմավորման արդյունքում միավորված 3 նախարարություններից` 13։ Բարձր տեխնոլոգիական արդյունաբերության նախարարությունում, հակառակը` կրճատումների փոխարեն նոր աշխատատեղեր են բացվել։ Եթե տրանսպորտի, կապի և ՏՏ նախկին նախարարությունը 2018թ–ին 130 աշխատակից ուներ, ապա նոր ձևավորված գերատեսչությունը`198։
Իսկ աշխատանքի և սոցիալական հարցերի նախարարությունում հաստիքների թիվը մնում է անփոփոխ է` 700։