ԵՐԵՎԱՆ, 11 նոյեմբերի – Sputnik. Ռուսաստանի ԱԳՆ ղեկավար Սերգեյ Լավրովը հայ գործընկեր Զոհրաբ Մնացականյանի հետ Մատենադարանում հանդիպել է Երևանի առաջատար բուհերի ուսանողների և դասախոսների հետ։
Աշխարհի լավագույն դիվանագետներից մեկի հետ շփվելու համար այստեղ հավաքվել էին Երևանի պետական համալսարանի, Ռուս–հայկական համալսարանի, Երևանում Մոսկվայի պետական համալսարանի մասնաճյուղի միջազգային հարաբերությունների և համաշխարհային քաղաքականության ֆակուլտետների ուսանողները։
Մատենադարանի դահլիճում Լավրովի համար պատրաստել էին սպիտակ հարմար բազկաթոռ, սակայն նա նախընտրեց զրուցել և ուսանողների հարցերին պատասխանել ամբիոնի մոտ կանգնած։
Համառոտ ներկայացնելով Հայաստանի և Ռուսաստանի ռազմավարական գործընկերության հիմնական «մեխերը»` Լավրովը խոսքը հանձնեց ապագա դիվանագետներին։ Առաջին հարցը վերաբերում էր ղարաբաղյան հակամարտությանը։
«Ես հենց նոր պատասխանեցի լրագրողների նույն հարցին մամուլի ասուլիսի ժամանակ»,–նշեց Լավրովը` գովելով ուսանողին «հասուն հարցի» համար։
Այնուամենայնիվ, Լավրովը կրկնեց պատասխանը` երկու–երեք նախադասությամբ բացատրելով Ռուսաստանի դիրքորոշումը հակամարտության կարգավորման հարցում:
«Մեզ համար չափազանց կարևոր է, որպեսզի Լեռնային Ղարաբաղում տիրի խաղաղություն, այլևս մարդիկ չմահանան, սահմանները բացվեն։ Ռուսաստանը կարող է դառնալ հակամարտության կարգավորման երաշխավոր։ Բայց հակամարտության երկու կողմերն իրենք պետք է հանգեն պայմանավորվածության»,-ասաց Ռուսաստանի արտգործնախարարը։
Դիվանագետն ուսանողների հետ խոսեց Սիրիայում տիրող իրավիճակի, Եվրամիության Արևելյան գործընկերության, Հայաստանում տեղի ունեցած հեղափոխության մասին։
«Մեր եվրոպացի գործընկերները սովորություն ունեն նոր կարգեր հաստատել տարածաշրջանում` անտեսելով, թե այդտեղ ինչ է արվել մինչ այդ։ Ռուսաստանի հետ Հայաստանի հարաբերությունները զարգանում են։ ԱՊՀ, ՀԱՊԿ, ԵվրԱզԷՍ շրջանակում համագործակցությունը դրա վառ ապացույցն է»,–նշեց նա։
Ավարտելով հանդիպման պաշտոնական մասը` հայտնի «պարոն ոչը» իր պատվիրակության ներկայացուցիչների հետ միասին ուղևորվեց դեպի ելք։ Տասնյակ ուսանողներ վազեցին նրա հետևից։ Ինչ–որ մեկը նամակ հանձնեց նախարարին, մյուսն ինքնագիր խնդրեց, իսկ ինչ–որ մեկը հասցրեց լուսանարվել։
ՄՊՀ–ի Երևանի մասնաճյուղի ուսանող Արման Մալոնին հաջողվեց հարց տալ Լավրովին և վերցնել բաղձալի ինքնագիրը։ Նա Լավրովին պարզեց նրա գիրքը` «Մենք քաղաքավարի մարդիկ ենք. մտորումներ արտաքին քաղաքականության մասին»–ը։
«Հարցի ժամանակ հուզվում էի։ Եվ ավելի շատ էի հուզվում, երբ նրանից ինքնագիր խնդրեցի»,–խոստովանում է ուսանողը։
Մինչ Արմանը գիրքը ձեռքին սպասում էր սիրելի դիվանագետին, նրա համակուրսեցիները գեղեցկանում էին լուսանկարվելու համար։ Իհարկե, նախարարը ժամանակ չուներ բոլորի հետ լուսանկարվելու համար։ Բախտը ժպտաց միայն Լուսյա Բաբայանին` ՄՊՀ–ի երևանյան մասնաճյուղի ուսանողուհուն։
«Շատ անսպասելի էր, որ նա համաձայնեց։ Օգնականներն ասացին, որ Լավրովը ժամանակ չունի, բայց նա որոշեց լուսանկարվել, հետո միայն հեռանալ»,–ասաց Լուսյան։
Դիվանագետը նստեց մեքենան ուսանողուհու նվեր սպիտակ նամակը ձեռքին։ Համեստ աղջիկը Լավրովին հանձնեց նամակը և այնքան արագ անհետացավ, որ հետո չկարողացանք գտնել նրան։
Հիշեցնենք, որ Սերգեյ Լավրովը պաշտոնական այցով Հայաստան է եկել նոյեմբերի 10-ին։ Երեկ երեկոյան նա Հայաստանի ազգային պատկերասրահում մասնակցել է Հայրենական մեծ պատերազմի հաղթանակի 75-ամյակին նվիրված «Ծաղիկներ մարտիկներին» ցուցահանդեսի բացմանը։
Նոյեմբերի 11–ին նրան ընդունել է ՀՀ վարչապետ Նիկոլ Փաշինյանը։