Դմիտրի Աթբաշյանի կարծիքով՝ դա նախևառաջ համաշխարհային միտում է, որովհետև բոլորը ցանկանում են օդային գծերը կարճացնել և խնայել ահագին նավթ ու ֆինանսական միջոցներ:
«Այս որոշումն աշխարհի մասշտաբով բոլոր ժողովուրդների համար շատ մեծ հաջողություն է, իսկ ինչ վերաբերվում է կոնկրետ Հայաստանին, ապա մեր երկիրը Վրաստանի հետ միանում է Եվրոպայի օդային տարածքին, և Հայաստանի օդային տարածքով շարժը կավելանա, ինչից մենք կունենանք մեծ եկամուտներ»,- նշում է Դմիտրի Աթբաշյանը:
«Ավիացիայի ազգային միավորում» կազմակերպության տնօրենի դիտարկմամբ՝ թեև Հայաստանի տարածքը փոքր է, սակայն մեր երկիրը գտնվում է օդային ճանապարհների խաչմերուկում: Խորհրդային տարիներին ԽՍՀՄ-ի ամբողջ տարածքում գործում էին 7 օդային միջանցքներ, որոնցից մեկը մերն էր` Մեղրիի մոտ: Այդ փաստն ինքնին խոսուն է: Աթբաշյանի կարծիքով՝ մեր երկրի դիրքն իսկապես շատ հարմար է, որովհետև հյուսիսային կիսագնդի երկրներից օրինակ` Աֆրիկա, Հնդկաստան թռչելու համար Հայաստանն ամենակարճ ուղին է:
Հիշեցնենք, որ 2019 թվականի նոյեմբերի 7-ից Հայաստանի և Վրաստանի օդային տարածքում ներդրվել է միասնական «Մայրուղիներից ազատ Հարավկովկասյան օդային տարածք» հայեցակարգ, որը թույլ է տալիս իրականացնել թռիչքներ 195 թռիչքային մակարդակից (FL 195) բարձր:
Սույն հայեցակարգի շրջանակներում կանխատեսվում է, որ հայեցակարգից կօգտվեն օրական 125, իսկ տարեկան՝ 45․000 տարանցիկ չվերթներ։