ԵՐԵՎԱՆ, 8 նոյեմբերի — Sputnik. Հայաստանի անտառների պահպանությանն ուղղված մեր քաղաքականությունը արդյունավետ է:
Այս եզրակացությանն է եկել ՀՀ վարչապետ Նիկոլ Փաշինյանը`փայտածուխի և շինափայտի այս տարվա ներկրման թվերն անցած տարիներին գրանցվածների հետ համեմատելով։ Այս մասին նա գրել է Fcebook-ի իր էջում։
«2019 թվականին 2017-ի համեմատ փայտածուխի ներկրումը Հայաստան աճել է 6.2 անգամ, կամ ավելի քան 500 տոկոսով: Ներմուծող ընկերությունների թիվը աճել է 22.6 տոկոսով (2017-ին 53 ընկերություն, 2018-ին 65 ընկերություն)»,–գրել է Փաշինյանը:
Նրա խոսքով` 2019 թվականի տասն ամիսների կտրվածքով ներմուծվել է նույնքան շինափայտ, ինչքան ողջ 2018 թվականի ընթացքում:
«Իսկ 2017-ի ամբողջ տարվա համեմատ այս տարվա տասը ամիսներին ավել է ներկրվել 77 տոկոսով ավելի շինափայտ, իսկ ներմուծող ընկերությունների թիվը ավելացել է 51.4 տոկոսով կամ 70 ընկերությունով՝ 206 ընկերություն նախկին 136-ի փոխարեն»,–գրել է վարչապետը:
Փաշինյանն ընդգծել է, որ Հայաստանի անտառների պահպանությանն ուղղված քաղաքականությունը արդյունավետ է: Այդ թվում՝ կարողացել ենք հաղթահարել վերը նշված շուկաներում մենաշնորհային դրսևորումները:
Հիշեցնենք, որ 2019թ.–ի ամռանը ծառահատումների և իշխանության «հարաբերությունները» սրվեցին։ Տավուշի մարզում բողոքի ակացիաներ տեղի ունեցան։
Փաշինյանը չի հրաժարվել 10 մլն ծառ տնկելու գաղափարից. վարչապետը կրկնեց իր հայտարարությունը
2019 թվականի հուլիսի 17-ին՝ ժամը 18-ի սահմաններից սկսած, մի խումբ անձինք, ապօրինի ծառահատումների դեմ պայքարի խստացման հետ կապված իրենց դժգոհություններն արտահայտելու նպատակով փակել են Հայաստան-Վրաստան միջպետական ճանապարհի Իջևան քաղաքի Երևանյան ու Իջևանյան փողոցների հատման խաչմերուկի հատվածը` խախտելով հասարակական կարգը, գործադրել բռնություն, որպես զենք օգտագործվող առարկաների՝ քարերի և մահակների գործադրմամբ, մարմնական վնասվածքներ են պատճառել ՀՀ ոստիկանության աշխատակիցներին` պատճառելով կյանքի և առողջության համար վտանգավոր բռնություն: