ԵՐԵՎԱՆ, 1 նոյեմբերի — Sputnik. Այսօր առավոտյան թափառող շների ոհմակը հարձակվել ու սատկացրել է Երևանի կենդանաբանական այգու 3 մուֆլոնի։ Այս մասին հայտնում են Երևանի կենդանաբանական այգուց։
«Նոյեմբերի 1-ին լույս առավոտ, մոտավորապես ժամը 06:00-ի սահմաններում Երևանի կենդանաբանական այգու տարածքում գրանցվել է թափառող շների ներթափանցման երկրորդ դեպքը: Ոհմակը հարձակվել է այգում պահվող թվով 3 մուֆլոնների (2 արու, 1 էգ) վրա: Գրանցվել է կենդանիների անկում: Շներին բռնել չի հաջողվել»,–նշված է այգու տարածած հայտարարության մեջ։
Երևանի կենդանաբանական այգու անձնակազմի կարծիքով` այգի մուտք գործած ոհմակը, ամենայն հավանականությամբ, նույն ոհմակն է, որը երեկ՝ հոկտեմբերի 31-ին, հարձակվել էր կենգուրուների վրա:
Հիշեցնենք, որ կենգուրուների ազատավանդակից հաջողվել է բռնել նույն ոհմակի 3 ձագերին, որոնք տեղափոխվել են Թափառող շների վնասազերծման ՀՈԱԿ:
Երևանի կենդանաբանական այգին ահազանգում է Երևան քաղաքի տարածքում չստերջացված և շների ոհմակի առկայության վտանգավորության մասին, որը նաև հանրային անվտանգության ապահովման հիմնախնդիր է, քանի որ ոհմակ կազմած, արդեն կենդանու որս արած շները վտանգավոր են թե՛ կենդանիների, թե՛ մարդկանց համար,
այգին դիմում է պատկան կառույցներին վերոնշյալ շների ոհմակին հրատապ կարգով գտնելու և վնասազերծելու նպատակով՝ հաշվի առնելով խնդրի հրատապությունն ու հանրային անվտանգության ապահովման կարևորությունը:
Երևանի կենդանաբանական այգու տնօրենն ազատման դիմում է գրել
Շների ներթափանցման հետ կապված մարդկային գործոնի բացառման համար այգու ղեկավարությունը դիմել է նաև ՀՀ իրավապահ մարմիններին՝ նախաքննություն սկսելու նպատակով։
Հիշեցնենք, որ երեկ թափառող շները հարձակվել ու հոշոտել էին այգու երեք կենգուրուներին։ Կենդանիների վրա հարձակում գործած շները, ըստ այգու ղեկավարության, տարածքում թափառող շներն են։
Շները չէի՞ն կարող երկրորդ անգամ ներս մտնել. սատկած կենդանիների աղմկոտ միջադեպի հետքերով