ԵՐԵՎԱՆ, 27 հոկտեմբերի — Sputnik. «Պոբեդա» ավիաընկերությունը որոշել է հոկտեմբերի 28-ից բարձրացնել արտասահմանյան չվերթների տոմսերի արժեքը 5, այլ ոչ թե 25 եվրոյով, ինչպես հաղորդվել է ավելի վաղ։ Այդ մասին տեղեկացնում է ՌԻԱ Նովոստին՝ հղում անելով ընկերության մամուլի ծառայությանը։
Ավելի վաղ Մոսկվայի քաղաքային դատարանն արգելել էր օտարերկրյա օդանավակայաններում «Պոբեդայի» չվերթերի վճարովի գրանցումը։ Դրանից հետո ընկերությունը հայտարարել է, որ հոկտեմբերի 28-ից դատարանի որոշումն ի կատար ածելու համար սակագներում կներառի արտասահմանյան օդանավակայաններում գրանցման ծառայության արժեքը, ինչի հետևանքով արտասահմանից Ռուսաստան տոմսերի գները կթանկանան 25 եվրոյով։
Ավիաընկերության հաղորդագրությունում նշվում է, որ «Պոբեդայի» սակագները թափանցիկ են և ճկուն, իսկ արտասահմանյան օդանավակայաններում, որտեղ ուղևորների գրանցման համար վճար է սահմանված, կարելի է խնայել միջոցները՝ օնլայն գրանցվելով և չվճարելով օդանավակայանում գործակալի ծառայության համար։ Բայց ընկերությանը պարտավորեցրել են ներառել գրանցման արժեքը բոլոր սակագներում։ Դա հարվածում է ուղևորների գրպանին։
Հայերը մեմեր են սարքել Ryanair–ի թեմայով. #ԿոֆեՀռո՞մ, թե՞ #կոֆեԲեռլին, սա է դարդը»
«Ուստի մենք խնդրում ենք մեր այցելուներին շարունակել գրանցվել օնլայն, այդ դեպքում մենք կբարձրացնենք սակագներն ընդամենը 5 եվրոյով, և միասին կվճարենք միայն նրանց գրանցման համար, ովքեր կօգտվեն գործակալի ծառայությունից», - կոչ է անում ընկերությունը։
Նշենք, որ «Պոբեդա» ցածր բյուջետային ավիաընկերությունը (մտնում է «Աերոֆլոտի» խմբի մեջ) Ռուսաստանի ամենաերիտասարդներից մեկն է։ Առաջին ինքնաթիռը իր թռիչքն իրականացրել է 2014 թվականի դեկտեմբերի 1-ին։