ԵՐԵՎԱՆ, 21 հոկտեմբերի — Sputnik. 2020թ.–ի սկզբից հայկական ավիաշուկա մտնող իռլանդական Ryanair ավիաընկերությանը պետբյուջեից որևէ գումար չի հատկացվել։ Այս մասին այսօր լրագրողների հետ զրույցում ասաց ՀՀ փոխվարչապետ Տիգրան Ավինյանը` անդրադառնալով լուրերին, թե ընկերությանը մի շարք առավելություններ ու պետբյուջեից գումար է տրվել։
«Պետբյուջեից ընկերությանը տրամադրվող գումարի մասին խոսք անգամ լինել չի կարող։ Հարկատուների հաշվին որևէ գումար չի տրամադրվում նոր ավիափոխադրողներին»,–ասաց նա։
Նրա խոսքով` Ryanair ավիաընկերությանը մեկ արտոնություն է տրվել` ազատել են օդի տուրքից։ Այս արտոնությունը կկիրառվի բոլոր այն ընկերությունների համար, որոնք նոր ուղղություններով չվերթներ կկազմակերպեն դեպի «Զվարթնոց» և հակառակ ուղղությամբ։
Ավինյանը վստահեցրեց, որ բացի այդ արտոնությունից, որևէ այլ արտոնություն չի տրվել Ryanair ավիաընկերությանը։
Անդրադառնալով վարչապետի ավիացիայի գծով խորհրդական Հակոբ Ճաղարյանի կարծիքին, թե այս փուլում բյուջետային ավիաընկերության մուտքը շուկա խանգարող հանգամանք կլինի տեղական ավիաընկերության կայացմանը` Ավինյանն արձագանքեց, որ վարչապետի խորհրդականը պետք է զբաղվի իր գործառույթներով` խորհուրդ տալով։
Երբ օդաչուն հայ է. «Գլուխգովան հռոմեացիներին հիշեցրեք Երևանի մասին». տեսանյութ
Հիշեցնենեք, որ իռլանդական Ryanair ավիաընկերությունը Հռոմի և Միլանի ուղղությամբ թռիչքները կիրականացնի հունվարից, իսկ ամռանից ավիաընկերության ինքնաթիռները կմեկնեն Բեռլին:
ՀՀ վարչապետ Նիկոլ Փաշինյանը խոստացել է ավիաընկերության որոշ չվերթեր ազատել «օդի տուրքից»` հիշեցնելով, որ բոլոր այն ուղղությունների համար, որոնցով վերջին մեկ տարվա ընթացքում Երևանից կամ Գյումրիից թռիչքներ չեն իրականացվել, կառավարությունը պարտավորվել է վերացնել «օդի տուրքը»։