ԵՐԵՎԱՆ, 21 հոկտեմբերի — Sputnik. Աշնանային եղանակն ու հոկտեմբերյան առաջին անձրևն այսօր երևանցիներից շատերին ստիպեցին առավոտյան 1-2 ժամ անցկացնել ճանապարհներին։
«Ճանապարհային անվտանգության ազգային խորհուրդ» ՀԿ -ի նախագահ Պողոս Շահինյանի դիտարկմամբ` երևույթը մի քանի բաղադրիչ ունի։ Դրանցից առաջինը կապված է ավտոմեքենան եղանակային փոփոխություններին չնախապատրաստելու հայկական ոչ ճիշտ մշակույթի հետ։
«Մարդիկ սկսում են անվադողերը փոխել միայն այն ժամանակ, երբ տեղում է առաջին ձյունը։ Սա հայերիս սովորությունն է։ Չգիտեմ ինչու, բայց բոլորը մինչև վերջին պահը սպասում են։ Բայց չէ՞ որ ձմեռային անվադողերի կարելի է անցնել արդեն հոկտեմբերից»,– ասաց Շահինյանը։
Դա է պատճառը, որ անձրևոտ եղանակներին Երևանում վթարների ու դրանց հետևանքով նաև խցանումների թիվն ավելանում է։
Ինչ վերաբերում է վթարներին ու ապահովագրական ընկերություններին սպասող վարորդներին, սրանք այսօր մայրաքաղաքում խցանումների առաջացման հիմնական պատճառներից են։
Ապահովագրությու՞ն, թե՞ «օրինականացված թալան». պարզաբանում են Sputnik Արմենիայի հյուրերը
Իրավիճակը շտկելու համար կառավարությունը նախատեսում է բալային համակարգ ներդնել կարգազանց վարորդներին վարորդական իրավունքից զրկելու համար։
Շահինյանի համոզմամբ` համակարգի ներդրումը երթևեկությունը կազատի այն մարդկանցից, որոնք տուգանք վճարելու խնդիր չունեն, ուստի կարող են անսահմանափակ թվով խախտումներ անել, վճարել ու շարունակել խախտել երթևեկության կանոնները։
«Բալային համակարգի դեպքում դու զրկվում ես վարորդական իրավունքից, և եթե վարորդական իրավունքի բացակայության դեպքում դու մեքենա ես վարում, կարող ես արդեն քրեական պատասխանատվության ենթարկվել»,– նշեց մեր զրուցակիցը։
ԱՊՊԱ–ին սպասող վարորդներին համար ևս նախատեսվում է որոշակի օրենսդրական փոփոխություններ։
«Մենք այսօր ունենք մինչև 100 000 դրամ վնասի շեմ, որի շուրջ վարորդները կարող են պայմանավորվել։ Բայց մեծ մասի մոտ հիմնականում վնասը լինում է մինչև 200 000 դրամ։ Այնպես որ, եթե շեմը բարձրացվի մինչև 200 000 դրամ կամ ավելի, կարծում եմ` դա մեծապես կօգնի խուսափել երկարատև խցանումներից»,–ասաց Շահինյանը։
Երևանյան խցանումների մեկ այլ լուծում կարող է լինել շրջանցող ճանապարհների կառուցումը նրանց համար, ովքեր կցանկանան խուսափել կենտրոնական ծանրաբեռնված փողոցներով երթևեկելուց։
Ինչո՞ւ է հայերին դուր գալիս «ճապոնականը», կամ ի՞նչ ապագա կարող էին ունենալ «սխալ» մեքենաները
Դե իսկ փողոցները բեռնաթափելու առաջին ու ամենակարևոր նախապայմանը հանրային տրանսպորտի համակարգն է, որն այսօր Երևանում, մեղմ ասած, բարձիթողի վիճակում է։
«Հասարակական տրանսպորտից օգտվելու համար այն պետք է լինի հարմարավետ։ Մարդիկ պետք է իմանան` երբ է այն ժամանելու, որ ժամին է ինքը տեղ (A կետից B կետ) հասնելու»,– ասաց Շահինյանը։
Ավելորդ է հիշեցնել, որ երևանյան տրանսպորտից օգտվողը ոչ միայն չգիտի` երբ է գալու բաղձալի տրանսպորտը, այլև չգիտի՝ գալու է ընդհանրապես, թե ոչ։
Հիշեցնենք` այսօր առավոտյան Երևանի հյուսիսային հատվածից դեպի քաղաքի կենտրոն շտապող վարորդները Աճառյան–Մյասնիկյան պողոտաները հաղթահարել են 1-2 ժամվա ընթացքում։ Պատճառը, ինչպես սովորաբար լինում է, երկու մարդատար ավտոմեքենաների թեթև բախումն էր։
Վարորդները փոխհատուցման շուրջ պայմանավորվածության չէին եկել ու որոշել էին սպասել ապահովագրական ընկերության աշխատակիցներին։
Ոստիկանությունը խոստանում է վերացնել հերթերը. ավտոմեքենաները կհաշվառվեն նոր կարգով
Նման դեպքերի, ի դեպ, այս ճանապարհին գրեթե ամեն օր պատահում են` առավոտյան դեպի կենտրոն, երեկոյան` հակառակ ուղղությամբ։
Օրվա պիկ ժամերին գրեթե նույն կաթվածահար վիճակում են նաև քաղաքի մյուս հատվածները կենտրոնին միացնող փողոցները։
Իսկ ավտոմեքենաների թիվը Հայաստանում շարունակում է աճել։ Անձրևները դեռ նոր են սկսվում։ Առջևում էլ ձմեռ է։