ԵՐԵՎԱՆ, 19 հոկտեմբերի-Sputnik. Հայաստանյան փառատոների թիվն ավելացավ ևս մեկով: Շիրակի մարզի Առափի համայնքում այսօր` հոկտեմբերի 19-ին, առաջին անգամ անցկացվեց Ղափամայի փառատոն:
«Անշուշտ, սա նոր հարթակ է գյուղացու համար իր բերքն ու բարիքը վաճառելու: Նմանատիպ նախաձեռնության կարիքը վաղուց էր զգացվում, ինչի մասին վկայում է այսօրվա փառատոնի բազմամարդ լինելը»,-նշեց փառատոնի կազմակերպիչներից` Սուսաննա Ստեփանյանը:
Բարի ավանդույթ. Թբիլիսիում տոլմայի փառատոն է անցկացվել. լուսանկարներ
Փառատոնը նպատակ ունի ակտիվացնել գյուղական կյանքն ու ճանաչելի դարձնել հայկական ավանդական խոհանոցի գաղտնիքները, դրանից բացի, զբոսաշրջության զարգացման միջոցով նպաստել համայնքում կենսամակարդակի բարձրացմանը:
«Նորամուծություններ ենք արել՝ նոր փաթեթավորմամբ, նոր մատուցմամբ, որ գյուղական շուկան նոր մատուցմամբ գնա քաղաքի բնակչին: Ապրանքն էկոլոգիապես մաքուր է, բայց արդեն նաև հաճելի փաթեթավորում ունի»,-նշում է Հայկավանի բնակիչ Վալերիա Մելքոնյանը:
Ինչ անակնկալներ է խոստանում Ախթալայում սպասվող Խորովածի փառատոնը
Ղափամայի փառատոնն ուղեկցվեց հայկական ավանդական ուտեստների ու ղափամայի հյուրասիրությամբ, ազգային երգ ու պարով ու ազգային խաղերով։ Կազմակերպվել էր գյուղական կենցաղի մասին պատմող ինտերակտիվ ներկայացում։
Թեև փառատոնն առաջին անգամ էր անցկացվում, բայց կազմակերպիչներն ամեն ինչ հաշվի էին առել. փառատոնի հյուրերին տեղացիները նախ հյուրասիրում էին, հետո առաջարկում մատչելի գնով ձեռք բերել իրենց արտադրանքից:
Ղափամա հյուրասիրեցին նաև ՀՀ ԿԳՄՍ նախարարի տեղակալ Գևորգ Լոռեցյանին: Երիտասարդ փոխնախարարն օգտվեց հյուրասիրությունից ու շատ հավանեց. «Համեղ է»,–ասաց նա:
Ղափամայի փառատոնը կազմակերպվել էր Առափիում, սակայն գաղափարը համախմբել էր նաև հարևան Ոսկեհասկ, Հայկավան, Ախուրիկ համայնքների բնակիչներին:
Կազմակերպիչները նպատակ ունեն ավանդական դարձնել Ղափամայի փառատոնը։