ԵՐԵՎԱՆ, 16 հոկտեմբերի — Sputnik. Գյումրիում սեպտեմբերի 21-ին տպագրված ՀԴՄ կտրոնների մասին ՀՀ վարչապետի հայտարարությունից հետո Շիրակի հարկային տեսչության պետը պաշտոնանկ է արվել։ Այս մասին այսօր լրագրողների հետ հանդիպմանը հայտարարեց ՀՀ ՊԵԿ նախագահ Դավիթ Անանյանը։
«Մենք Շիրակի հարկայինի ղեկավարին փոխել ենք, որովհետև կարծել ենք, որ նա էլ իր հերթին թերացել է իր ծառայությունը կատարելիս»,– ասաց Անանյանը։
Անկախության տոնը Գյումրիում նշելը որպես ապակենտրոնացմանն ուղղված քայլ. ի՞նչ կտա դա
ՊԵԿ նախագահն ընդունում է, որ Գյումրիում բացահայտված իրողությունը վկայում է ՊԵԿ համակարգում առկա թերությունների մասին, բայց ավելի շատ, Անանյանի համոզմամբ, դա ՀԴՄ կտրոն չտրամադրելու` ձևավորված մշակույթի դրսևորումն է։
Ի դեպ, Գյումրիում սեպտեմբերի 21-22–ին գրանցված աննախադեպ բիզնես ակտիվության ցուցանիշների ուսումնասիրությունը ՊԵԿ–ն իրականացրել է հենց վարչապետի հանձնարարականով։
«Մենք սեպտեմբեր ամսվա երեք week end-ները համեմատել ենք իրար հետ։ Եթե սեպտեմբերի 6-8–ին առևտրի, հանրային սննդի ոլորտում տպվել է 112 527 կտրոն, որով հայտարարագրվել է 381 մլն դրամ, 13-15–ն ընկած ժամանակահատվածում` երեք օրվա ընթացքում, տպվել է 118 000 կտրոն, հայտարարագրվել 393 մլն դրամ, սեպտեմբերի 20-22-ին տպվել է 115 000 կտրոն և հայտարարգրվել է 403 մլն դրամ»,– ասաց Անանյանը։
Այնուամենայնիվ, 2019թ.–ի հունվար– սեպտեմբեր ամիսներին տպված ՀԴՄ կտրոնների քանակը 85.5 մլն հատով կամ 236 մլն դրամով ավելացել է նախորդ տարվա նույն ժամանակահատվածի համեմատ։
ՊԵԿ նախագահի` լրագրողներին տրամադրված պաշտոնական վիճակագրության համաձայն` 2019-ին տպագրվել է 312 386 974 ՀԴՄ կտրոն` 1 348 765 մլն դրամի չափով, իսկ 2018թ.–ին տպագրվել է 226 896 179 կտրոն` 1 112 615 դրամի։
Հիշեցնենք` հոկտեմբերի 9-ին Հայաստանի տնտեսությանը նվիրված համաժողովում Նիկոլ Փաշինյանը հայտարարել էր, որ սեպտեմբերի 21-ին Գյումրիում տպվել է ընդամենը 10 մլն դրամի կտրոն։
«Տպվել է այնքան ՀԴՄ, որքան նախորդ օրերին էր տպվել։ Այսինքն՝ Գյումրու մեր գործընկերներն իմացել են, որ հարկայինն այդ օրը ոչինչ չի անելու, ո՛չ ռեյդ է լինելու, ո՛չ որևէ այլ բան»,- ասել էր Փաշինյանը։
Փաշինյանի համոզմամբ` այս օրինակը վկայում է, որ կառավարության ջանքերին ընդառաջ բիզնեսն առայժմ նույնիսկ կես քայլ չի անում։