ԵՐԵՎԱՆ, 16 հոկտեմբերի – Sputnik. ՊԵԿ–ում պարգևավճարներ վճարվել են, վճարվում են ու վճարվելու են։ Այսօր լրագրողների հետ հանդիպմանը հայտարարեց ՀՀ ՊԵԿ նախագահ Դավիթ Անանյանը։
«Ամեն ամիս բաժնի պետերը, կառուցվածքային ստորաբաժանումների ղեկավարները մեր կողմից հաստատված կարգի համաձայն, 0.3-1.3 գործակցի շրջանակներում գնահատում են բոլոր աշխատողների աշխատանքը։ Ընդ որում, գնահատվում է աշխատանքի թե՛ անձնական որակները, որը 30 տոկոս կշիռ ունի, թե՛ պաշտոնեական պարտականությունների կատարումը, որն ունի 70 տոկոս կշիռ»,– ասաց Անանյանը։
Բաժնի պետերի տրամադրած տվյալների հիման վրա, Անանյանի խոսքով, ամեն ամիս ինքն անձամբ է հաշվարկում ՊԵԿ աշխատակիցների պարգևավճարները։
Որոնք են Հայաստանի ամենաստվերային ոլորտները. մանրամասնում է ՊԵԿ նախագահը
Հիշեցնենք` 2018թ.–ի տարեվերջին ՊԵԿ–ում միլիոնավոր դոլարների հասնող պարգևատրումների թեման լայն քննարկման առիթ էր դարձել հանրության շրջանում։
Չնայած դրան, 2019թ.–ին կառավարությունը 2.3 միլիարդ դրամով ավելացրեց ՊԵԿ–ի` 2019 թվականի պարգևատրման ֆոնդը:
Վարչապետը պետական ծառայողներին այս կերպ խրախուսելը որակեց որպես հակակոռւպցիոն քայլ։
Ստուգումներ սննդի կետերում և 5 հազար տոննա տեխնիկական աղ. ո՞վ է ուզում թունավորել հայերին
Ըստ մամուլի` ՊԵԿ ղեկավարությունը 2018թ.–ին 8-9 մլն դրամի, աշխատակիցները` քարտուղարուհին, վարչության պետերը` 2 միլիոն դրամ և ավելի պարգևավճարներ են ստացել։
Դավիթ Անանյանը լրագրողների հետ զրույցում չէր ցանկացել հայտնել իր աշխատակիցների ֆինանսական գաղտնիքները, բայց հաստատել էր, որ ինքն 8 ամսվա համար 14 մլն դրամ պարգևավճար է ստացել։