ԵՐԵՎԱՆ, 3 հոկտեմբերի — Sputnik. «Սանիթեք» ընկերությունը սկսել է միջազգային արբիտրաժային դատարան դիմելու գործընթացը։ Այս մասին ընկերությունը հայտարարություն է տարածել։
«Որպես այդ գործընթացի առաջին քայլ` ընկերության բաժնետերը՝ Նիկոլաս Էլ Թավիլը, գործելով նաև մյուս բաժնետերերի անունից, ներդրումային վեճի առկայության վերաբերյալ այսօր ծանուցել է Հայաստանի Հանրապետության կառավարությանը և Երևանի քաղաքապետարանին»,–նշվում է «Սանիթեքի» հայտարարության մեջ:
Հիշեցնենք` հոկտեմբերի 3–ին Երևանի քաղաքապետ Հայկ Մարությանը հայտարարել էր, որ ամբողջությամբ, միակողմանի կերպով լուծում է «Սանիթեք» ընկերությունների հետ կնքված պայմանագրերը։
Քաղաքապետը նշել էր, որ 2017 թվականից ի վեր «Սանիթեք» ընկերությունը սկսել է թերանալ աղբահանության գործում։ Այդ թերացումներն ահագնացել են 2018 թվականի կեսերին և շարունակվել մինչև 2019 թվականի սեպտեմբերը։
Քիչ է մնացել. «Սանիթեքն» արբիտրաժային դատարանով քաղաքապետարանին վախեցնել չի կարող
Վերը նշված փաստերը քաղաքային իշխանությանը ստիպել են ուսումնասիրել` արդյոք «Սանիթեք» ընկերությունը պատշաճ կերպով է կատարում իր կողմից կնքված պայմանագրերի բոլոր կետերը, և ընդհանրապես, ստուգել այդ պայմանագրերի կնքման օրինականությունը։
Այս հանգամանքները պարզելու համար 2019 թվականի հուլիսից քաղաքապետ Մարությանի հանձնարարությամբ Երևանի քաղաքապետարանի աշխատակիցները սկսել են «Սանիթեք» ընկերությունների տեխնիկայի ինչպես նաև գործունեության համար անհրաժեշտ այլ պայմանների ուսումնասիրությունը և գույքագրումը, որն ավարտվել է քաղաքապետի հայտարարությունից օրեր առաջ։
Մարությանի խոսքով` աղբի սիստեմատիկ չհավաքման փաստերը, աղբամանների փաստացի խիստ անբավարար քանակը, դրանց տեխնիկական վիճակը և շահագործվող աղբատար մեքենաների անբավարար քանակը, որոնք միասին վերցրած` անհնար են դարձնում պայմանագրով սահմանված պահանջներին և ժամկետներին համապատասխան ծառայությունների մատուցումը։
Իր հերթին «Սանիթեք» ընկերությունը հոկտեմբերի 10–ին հայտարարել էր, որ դիմելու է Արբիտրաժային դատարան.
«Երևանի քաղաքապետարանի, ՀՀ կառավարության և գործին առնչվող մյուս մարմինների գործողությունները` «Սանիթեք» ընկերությունը գնահատմամբ խտրական են և պատժիչ, ինչպես նաև նպատակ ունեն օտարերկյա ներդրող համարվող ընկերությանը ենթարկել էքսպրոպրիացիայի և բռնագանձել վերջինիս ակտիվները»,– հայտարարել էր «Սանիթեքը»:
Հիշեցնենք` հոկտեմբերի 8-ին լրագրողների հետ զրույցում պատասխանելով «Սանիթեքի»` արբիտրաժային դատարան դիմելու հնարավորության մասին հարցին, Երևանի քաղաքապետ Հայկ Մարությանն ասել էր, որ քաղաքապետարանը պատրաստ է դրան։
Հիշեցնենք նաև, որ օգոստոսի 28-ին «Սանիթեք» ընկերությունը հայտարարել էր, որ աղբահանության ոլորտում ծառայությունների մատուցման վատթարացում է լինելու, քանի որ ֆինանսական ճնշումների արդյունքում ընկերությանը վճարվող գումարից պահվել է ավելի քան 300 մլն ՀՀ դրամ:
Քաղաքապետարանի պաշտոնյաներն օգնել են «Սանիթեքին» խաբել պետությանը
Սեպտեմբերի 2–ին «Սանիթեք» ՍՊԸ հայաստանյան մասնաճյուղի և «Սանիթեք Ինթերնեյշնլ» ՍՊԸ տնօրեն Նիքոլա Էլ Թաուիլը հայտարարություն էր տարածել, որտեղ նշել էր, որ ծառայությունների ոչ պատշաճ մատուցումը պայմանավորված է Երևանի քաղաքապետարանի կողմից՝ պայմանագրով սահմանված վճարման պարտավորության խախտմամբ: Ընկերությունը պնդում էր, որ Երևանի քաղաքապետարանը, ընդհանուր առմամբ, երկու պայմանագրերի շրջանակներում պակաս է վճարել ավելի քան 330 000 000 դրամ:
«Սանիթեքի» գործողությունները քաղաքային իշխանությունը գնահատել էր որպես պայմանագրային պարտավորությունների խախտման ծայրահեղ դրսևորում և խոստացել, որ այն ունենալու է իր իրավական հետևանքները: