ԵՐԵՎԱՆ, 14 հոկտեմբերի — Sputnik. Բրիտանական Independent թերթը Հայաստանի Ազգային ժողովի շենքը ներառել է աշխարհի ամենագեղեցիկ խորհրդարանների տասնյակում։ Աշխարհի խորհրդարանների լուսանկարները` դրանց ճարտարապետության մասին սիրողական մեկնաբանություններով, կազմել է Twitter–ի օգտատերերից մեկը` Ալան Ֆոլդսը։
Արդեն գիտեք` ումից պահանջել. Արթուր Մեսչյանը խոստանում է պահպանել Երևանի պատմական շենքերը
Հայաստանի խորհրդարանի շենքը կառուցվել է 1950թ–ին` ճարտարապետ Մարկ Գրիգորյանի նախագծով (նրա նախագծով է կառուցվել նաև Մատենադարանը)։ Նախկինում այստեղ է գտնվել Հայկական ԽՍՀ Կոմկուսի կենտկոմի շենքը, իսկ ավելի ուշ տեղափոխվել է հանրապետության խորհրդարանը։
«Գեղեցիկ ճարտարապետական համաչափություն, առաջին հարկի մոխրագույնի և վերնահարկերի ոսկեգույնի հակադրություն։ Շուրջբոլորի սիզախոտը և ծառերը նույնպես գեղեցիկ են», – գրում է Ֆոլդսը։
Նրա հավաքած լուսանկարների հիման վրա հեղինակները կազմել են լավագույն տասնյակ` առանց տեղերի բաժանելու, բայց «գրան պրին» անվերապահորեն բաժին է ընկել Հունգարիայի խորհրդարանին։ Շենքը կառուցվել է 1880-90–ական թթ–ին և բացվել 1896թ–ին հունգարական կառավարության հիմնադրման 1000–ամյակի առթիվ։
Ռումինիայի խորհրդարանը սկսել են կառուցել 1980թթ–ի կեսերին ու ավարտել 90–ականների վերջին` արդեն իշխանափոխությունից հետո։
Տրինիդադ և Տոբագոյի խորհրդարանը, որն անսպասելիորեն մեծ է նման փոքր երկրի համար, կառուցված է դասական ճարտարապետության տարրերով, բայց աչքի է ընկնում ալ կարմիր գույնով, որի ֆոնին սպիտակ գմբեթն ավելի թեթև է երևում։
Անգոլայի խորհրդարանը շրջապատված է մեծ այգով և նույնպես առանձնանում է կարմիր գույնով։ Դրա մեծ գմբեթը մի քիչ հիշեցնում է Կապիտոլիումը։
Տասնյակում ներառված է նաև Կապիտոլիումը։ «Որքան էլ այն ծանոթ լինի բոլորին, միևնույն է, այն հիանալի է», – գրել է թերթը։
Հնդկաստանի խորհրդարանը ոչ միայն արտաքուստ է գեղեցիկ, այլ նաև հետաքրքիր խորհրդանիշ ունի։ Այն կառուցված է անիվի տեսքով, որը խորհրդանշում է Դհարմաչկարան կամ Դհարմայի հայտնի անիվը, որը խորհրդանշում է վերասերումներից մաքրվելը։ Նշենք, որ դա է խորհրդանշում նաև Հնդկաստանի դրոշի կլոր շրջանը։ Հատկանշական է, որ շենքը կառուցվել է անգլիացի ճարտարապետների նախագծով դեռ գաղութատիրության շրջանում։
Կանադայի խորհրդարանը հիշեցնում է Վեսթմինստերյան աբբայությունը, բայց դրա պատճենը չի և շատ գեղեցիկ է շրջապատող այգիների մեջ։
Սեյշելյան կղզիների խորհրդարանը կառուցված է հանգստավայրի ոճով։ Տանիքին արևային վահանակներով մեծ բունգալո կա։
Վերջապես, հեղինակների ուշադրությունը գրավել է Բութանի կարմիր խորհրդարանը։ Այն կառուցված է բուդդայական ճարտարապետության ոճով` տանիքներին ոսկյա մեհյաններով։