ԵՐԵՎԱՆ, 12 հոկտեմբերի — Sputnik. Հանրահայտ մոդել, ռեալիթի շոուի աստղ Քիմ Քարդաշյանը ՀՀ նախագահ Արմեն Սարգսյանի հետ հանդիպումից օրեր անց նոր լուսանկար է հրապարակել Instagram–ի իր էջում։
«Նախագահ Արմեն Սարգսյանի ու նրա ընտանիքի հետ ընթրիքը տպավորիչ էր։ Բազում հետաքրքիր դեպքեր են կատարվում Հայաստանում»,– գրել է Քարդաշյանը։
Սարգսյանը Քիմ Քարդաշյանին ու նրա քրոջը` Քորթնի Քարդաշյանին հյուրընկալել էր հոկտեմբերի 9-ին։
Այդ օրը հանդիպման մասին Instagram–ի իր էջում հայտնել էր ՀՀ նախագահը։
«Քիմը և Քորթնին պատմեցին, որ Հայաստան իրենց այցից շատ դրական լիցքեր են ստացել»,– գրել էր նա:
Հիշեցնենք` Քիմ Քարդաշյանը քրոջ` Քորթնի ու երեխաների հետ Հայաստան էր ժամանել հոկտեմբերի 6-ի ուշ երեկոյան։ Նրանց (բացի ավագ Նորթից) մկրտել են Էջմիածնում։ Քիմը մասնակցել է WCIT համաժողովին, իսկ այդ ընթացքում Քորթնին երեխաների հետ զբոսնել է Երևանում և ճաշել ռեստորաններից մեկում, որտեղ հայերեն է խոսել անձնակազմի հետ։
Հոկտեմբերի 9-ին նրանք այցելել են Գառնի, ընդ որում, եղել են հայ դիզայներների կարած հագուստով։ Քույրերն ընտրել են նաև հայկական ապրանքանիշներից մեկի զարդերը։ Քիմն ու Քորթնին Հայաստանում են նկարահանել Keep up with the Kardashians հեռուստաշոուի հերթական դրվագը։