ԵՐԵՎԱՆ, 11 հոկտեմբերի — Sputnik, Նելլի Դանիելյան. Հրայր Թովմասյանի պաշտոնանկության նախագծի քննարկումը Սահմանադրական դատարանը կարող է հետաձգել առավելագույնը մինչև դեկտեմբերի 26-ը։
Բանն այն է, որ օրենքը դիմումի քննարկման համար առավելագույնը 80-օրյա ժամկետ է սահմանում։
Այս մասին Sputnik Արմենիայի հետ զրույցում ասաց սահմանադրական իրավունքի մասնագետ Վարդան Այվազյանը։
«Սահմանադրական դատարանի մասին օրենքը սահմանում է, որ դիմումը պետք է քննարկվի մուտքագրման պահից առավելագույնը 30 օր հետո։ Եթե լրացուցիչ քննարկումների կարիք է առաջանում` ևս 50 օր։ Տեսականորեն, առավելագույնը մինչև 80 օր»,– ասաց Այվազյանը։
ՍԴ Աշխատակազմի ղեկավար Էդգար Ղազարյանը Sputnik Արմենիային հայտնեց, որ ԱԺ դիմումը ՍԴ մուտք է արվել հոկտեմբերի 7-ին։
«Օրենքը նախատեսում է 7–օրյա ժամկետ։ Այսինքն` հաջորդ երկուշաբթի` հոկտեմբերի 14-ին Սահմանադրական դատարանը կներկայացնի ԱԺ դիմումի վերաբերյալ իր դիրքորոշումը»,–ասաց Ղազարյանը։
Բաբայան. «Թովմասյանի լիազորությունները դադարեցնելը քաղաքական դրդապատճառներ ունի»
Նշենք, որ խոսքն առայժմ ԱԺ դիմումը վարույթ ընդունել–չընդունելու մասին է։
Այլ կերպ ասած` Սահմանադրական դատարանը կարող է ընդհանրապես մերժել դիմումը վարույթ ընդունել և այդ պարագայում Հրայր Թովմասյանի պաշտոնանկության հարցը ՍԴ–ում ընդհանրապես չի էլ քննարկվի։
Հիշեցնենք` հոկտեմբերի 3-ին ԱԺ–ն ընդունեց «Իմ քայլը» խմբակցության` Սահմանադրական դատարանի անդամ Հրայր Թովմասյանի լիազորությունները դադարեցնելու հարցով ՍԴ դիմում ներկայացնելու մասին նախագիծը։
Դիմումում Թովմասյանի պաշտոնանկության համար 4 հիմք է ներկայացված։
Նշվում է, որ նա իրավունք չուներ մասնակցելու Ռոբերտ Քոչարյանի գործով ՍԴ վարույթին, քանի որ փոխկապակցված է ՀՀԿ–ի, ՀՀԿ նախագահ Սերժ Սարգսյանի ու Քոչարյանի հետ։
Հրայր Թովմասյանը նաև Քոչարյանի պաշտպան Արամ Օրբելյանի կնքահայրն է։ Նա նախկինում մարտի 1–ի գործով դատավարությունների վերաբերյալ հրապարակային կարծիք է հայտնել, մասնակցել քրգործի վարույթին, ինչը կողմնակալ վերաբերմունքի հիմք է տալիս։ Իսկ չորրորդ պատճառն այն է, որ Թովմասյանը բոլոր հանգամանքներն անտեսել է ու չի հայտնել նիստին իր մասնակցության անհնարինության մասին։