ԵՐԵՎԱՆ, 4 հոկտեմբերի — Sputnik.Sputnik Արմենիայի տեղեկություններով, մեղադրանք է առաջադրվել ՀՀ ոստիկանության քրեական հետախուզության գլխավոր վարչության պետի նախկին տեղակալ Հովհաննես Թամամյանին։ Նա հրավիրվել է նախաքննական մարմին` հարցաքննության։
Գործից այլ մանրամասներ առայժմ չեն հայտնվում։ Հայտնի է միայն, որ Թամամյանը` իր նախկին ղեկավարի` ոստիկանության քրեական հետախուզության գլխավոր վարչության պետ Հայկ Միլիտոնյանի ու մի խումբ այլ պաշտոնյաների հետ հետին ամսաթվով ստորագրել է 2008թ–ի մարտի 1-ին վերաբերող կեղծ փաստաթղթեր, որոնք տրամադրվել են ՀՀ Ազգային ժողովի մարտի 1- 2-ի իրադարձություններն ուսումնասիրող ՀՀ ԱԺ ժամանակավոր հանձնաժողովին, ՀՀ նախագահ Սերժ Սարգսյանի կարգադրությամբ ստեղծված փորձագետների փաստահավաք խմբին ու այդ դեպքերը քննող քննչական մարմիններին։
Նշենք, որ ՀՔԾ–ն այս տեղեկությունն առայժմ չի մեկնաբանում։
Հիշեցնենք, որ սեպտեմբերի 25-ին ՀՀ նախկին ոստիկանապետ Ալիկ Սարգսյանին մեղադրանք է առաջադրվել` պաշտոնեական լիազորությունները չարաշահելու, պաշտոնեկան կեղծիքի և հանցագործությունը պարտակելու հոդվածներով։
Ըստ մեղադրանքի` 2008–ի մարտի 1-ին և 2-ին Երևանում տեղի ունեցած իրադարձություններից հետո 2008-ին ՀՀ նախագահի օգնականներ Գևորգ Կոստանյանն ու Գևորգ Մհերյանը պահանջել էին հետին ամսաթվով կազմել և շրջանառության մեջ դնել մարտի 1-ին և 2-ին ոստիկանության գործողությունների իրավաչափությունը հիմնավորող փաստաթղթեր:
«Ես 100 տոկոս գիտեի, որ մեղադրանք է առաջադրվելու». Քոչարյանը պատմեց` ինչու է վերադարձել
Այդ հարցով հրավիրված խորհրդակցությունից հետո ՀՀ ոստիկանության պետ Ալիկ Սարգսյանը և ՀՀ ոստիկանության մի խումբ բարձրաստիճան պաշտոնատար անձինք ձեռնամուխ են եղել Գևորգ Կոստանյանի և Գևորգ Մհերյանի ցուցումներն ու հանձնարարությունները կատարելուն: