ԵՐԵՎԱՆ, 27 սեպտեմբերի – Sputnik. Երևանի քաղաքապետարանի պաշտոնատար անձինք պաշտոնեական դիրքը ծառայության շահերին հակառակ օգտագործելով` համայնքին պատճառել են շուրջ 5.313.721.900 ՀՀ դրամի նյութական վնաս, տեղեկացնում է ՀՀ դատախազությունը։
Նրանք 2013թ. և 2015թ. փաստաթղթերում ակնհայտ կեղծ տեղեկություններ են մտցրել, իբր «Սանիթեքի» ունեցած ռեսուրսներն ու պահանջվող որակավորումները համապատասխան են ներկայացվող պահանջներին։ Դրանից բացի, պայմանագրերը կնքվել են առանց անհրաժեշտ բանկային երաշխիքի։
Քաղաքապետարանի պաշտոնատար անձինք, սկսած 2014թ., վերահսկողություն չեն իրականացրել կատարված նկատմամբ: Արդյունքում` տարիներ շարունակ համայնքային բյուջեից «Սանիտեք Ինթերնեշնլ» և «Սանիտեք SARL» ընկերություններին վճարվել են չկատարված աշխատանքների և չմատուցված ծառայությունների համար:
Ուսումնասիրությամբ պարզվել է, օրինակ, որ յուրաքանչյուր տարի 1.805.000.000 ՀՀ դրամ է վճարվել 16.000 հատ 1100 լիտրանոց մետաղական, անվավոր կոնտեյներների տեղադրման և սպասարկման համար։ Երևանի քաղաքապետարանի տրամադրած փաստաթղթերի ուսումնասիրությամբ, սակայն, պարզվել է, որ գույքագրվել է ընդամենը 5170 հատ կոնտեյներ, որոնցից միայն 99-ն են եղել մետաղական:
Այսպիսով, Երևանի քաղաքապետարանի պաշտոնատար անձանց կողմից պաշտոնական փաստաթղթերում ակնհայտ կեղծ տեղեկություններ կամ գրառումներ մտցնելու, բանկային երաշխիքի բացակայությամբ համաձայնագրեր կնքելու, պաշտոնեական դիրքը ծառայության շահերին հակառակ օգտագործելու կամ ծառայողական պարտականությունները չկատարելու արդյունքում համայնքին պատճառվել է շուրջ 5.313.721.900 ՀՀ դրամի նյութական վնաս՝ առաջացնելով ծանր հետևանքներ:
ՀՀ գլխավոր դատախազության պետական շահերի պաշտպանության վարչությունում այս հիմքով հարուցվել է քրեական գործ ՀՀ քրեական օրենսգրքի 314-րդ հոդվածի (Պաշտոնեական կեղծիքը) 1-ին մասով, 308-րդ հոդվածի (Պաշտոնեական լիազորությունները չարաշահելը) 2-րդ մասով, 178-րդ հոդվածի (Խարդախությունը) 3-րդ մասով:
Տուգանքները պայմանագրի համաձայն էին. Երևանի քաղաքապետարանը պատասխանել է «Սանիթեքին»
Քրեական գործի նախաքննությունը հանձնարարվել է ՀՀ քննչական կոմիտեին: