Երկու եռյակ` նույն հիվանդանոցում. Մոր և մանկան առողջության պահպանման գիտահետազոտական կենտրոնում 26–ամյա Լուսինե Շառոյանը և 40–ամյա Աննա Ֆրանգուլյանը օրերս եռյակ են ունեցել։ Լուսինեն 2 աղջիկ և 1 տղա է լույս աշխարհ բերել, Աննան` 3 տղա. երկու եռյակների դեպքում էլ երեխաները բնական ճանապարհով են բեղմնավորվել։
Sputnik Արմենիայի հետ զրույցում Աննա Ֆրանգուլյանը նշեց, որ երկու տղա ունի` 2 և 4 տարեկան, ու հղիության ժամանակ, երբ իմացել է, որ եռյակ է ունենալու, երազել է, որ մեկը գոնե աղջիկ լինի։ «Աստծո գործերին խառնվել չես կարող ու հիմա երջանիկ եմ, որ 5 տղա ունեմ։ Շատ հեռու ապագայի մասին չեմ մտածում` բանակ, կրթություն, քանի որ վստահ եմ` ամեն ինչ իր հունով է գնալու։ Գիտեմ, հեշտ չի լինելու, բայց ուրախությունս, երջանիկ պահերն էլ եռապատկված է հիմա»,– ասաց նա։
Մյուս եռյակի մայրը` Լուսինեն, որն արդեն իսկ 4 և 6 տարեկան աղջիկներ ունի, խոստովանում է` երբեք չի պատկերացրել, որ 26 տարեկանում արդեն 5 երեխա կունենա։ Լուսինեն ասում է, որ յուրաքանչյուրն ինքն է որոշում` քանի երեխա պետք է ունենալ, բայց վստահեցնում է` բազմազավակ մայր լինելն ուրիշ հաճույք է։
«Երկու երեխաներիս փորձից արդեն գիտեմ` առաջին երկու տարին է դժվար լինելու։ Դրանից հետո ամենահաճելի պահերն են, երբ երեխայիդ ամեն ասածի և արածի համար սկսում ես քեզ երջանիկ զգալ»,–ասաց Լուսինեն։
Լուսինեի երեխաները ծնվել են 1450, 1650 և 1750 գրամ քաշով, իսկ Աննայինը` 1450, 1600 և 1650 գրամ։
Ի դեպ, Լուսինեի բժիշկն Արմեն Բադալյանն է, իսկ Աննայինը` Արմեն Գասպարյանը։ Բժիշկները հայտնեցին, որ կանայք երեխաների հետ մոտ օրերս դուրս կգրվեն։
Մանրամասները` Sputnik Արմենիայի տեսանյութում։