ԵՐԵՎԱՆ, 27 սեպտեմբերի - Sputnik. Ոստիկանության ծառայողների խուզարկության արդյունքում Երևանի դեղատներից մեկի տնօրենի բնակարանում հայտնաբերվել է 35 գրամից ավելի դեղնականաչավուն կանեփանման զանգված և գորշ հետքերով կաթուցիչներ, որոնք առգրավվել են և ուղարկվել փորձաքննության։ Այս մասին հայտնում են ՀՀ ոստիկանությունից։
Հիշեցնենք`օրերս Երևանում գործող մի քանի դեղատներում կատարված խուզարկությունների արդյունքում ոստիկանության աշխատակիցները հայտնաբերել էին ընդհանուր 843 հոգեներգործուն դեղահաբ։ Դեղատների տնօրեններն էլ ձերբակալվել էին։
Հարուցված քրեական գործի շրջանակներում ոստիկանության ԿՀԴՊ գլխավոր վարչության թմրամիջոցների անօրինական շրջանառության դեմ պայքարի վարչության ծառայողները շարունակում են օպերատիվ-հետախուզական միջոցառումները։
Կատարվում է նախաքննություն։