ԵՐԵՎԱՆ, 24 սեպտեմբերի – Sputnik.Հայաստանի ազգային արխիվն ու Mémorial de la Shoah (Շոահի հուշահամալիրը Փարիզում հոլոքոստի թանգարանն է) համագործակցության համաձայնագիր ստորագրեցին։ Պայմանագիրը ենթադրում է, որ հայկական հայերի ու հրեաների ցեղասպանության վերաբերյալ փոխադարձ հետաքրքրություն ներկայացնող տեղեկության ու արխիվային փաստաթղթերի փոխանակում պետք է տեղի ունենա։
Համագործակցության մասին համաձայնագրերը սեպտեմբերի 24-ին Ֆրանսիայի դեսպանությունում ստորագրեցին Ազգային արխիվի տնօրեն Ամատունի Վիրաբյանն ու Շոահի հուշահամալիրի տնօրեն Ժակ Ֆրեջը: Այս մասին Ֆրանսիայի դեսպանատունը հայտնում է Facebook–ի իր էջում։
«Ոչնչացնելու մտադրություն». ցեղասպանության մասին ֆիլմն առաջադրվել է «Էմմի» մրցանակի
Համաձայնագրի ստորագրմանը ներկա էր ՀՀ-ում Ֆրանսիայի արտակարգ և լիազոր դեսպան Ջոնաթան Լաքոթը։ Վերջինիս կարծիքով` համագործակցությունն ապացուցում է, որ Հայաստանն ու Ֆրանսիան ունեն ընդհանուր հիշողություն:
«Այս տարվանից սկսած՝ ապրիլի 24-ը Ֆրանսիայում համարվում է Հայոց ցեղասպանության հիշատակի օր: Ֆրանսիացիները քաջատեղյակ են Հայոց ցեղասպանությանը, և նրանց տեղեկացվածությունը պայմանավորված է այդ բնագավառում իրականացված հետազոտությունների արդյունքներով: Թեմայի շուրջ աշխատանքներ են անցկացվում դպրոցական, դասավանդողների վերապատրաստման ծրագրերում և այնպիսի հաստատություններում, ինչպիսին Շոահի հուշահամալիր-հիմնադրամն է»,-ընդգծեց դեսպանը:
Ամատունի Վիրաբյանի խոսքով` արխիվային գործի բնագավառում իրենք միջազգային համագործակցության բավականին մեծ փորձ ունեն: Աշխատել են նաև ֆրանսիական կողմի հետ:
«Այսօր առաջին անգամ մենք ստորագրում ենք համաձայնագիր, որը միտված է Հայոց ցեղասպանության մասին հիշողությունների պահպանմանը և գիտական հետազոտությանը, որ նման անմարդկային երևույթներ այլևս չլինեն: Կարծում եմ` համաձայնագիր ստորագրելը հաճելի արարողություն է, բայց անպայման անհրաժեշտ է իրագործել դրանում զետեղված կետերը»,-նշեց Վիրաբյանը:
«Մեր արխիվում պահվում են բազմաթիվ փաստաթղթեր, բայց հատկապես շատ են Հայոց ցեղասպանությանը վերաբերող նյութերը: Ունենք փաստաթղթեր՝ կապված ասորիների, եզդիների ցեղասպանությունների հետ, որոնք նույնպես ներառվելու են մեր համատեղ աշխատանքներում»,-շեշտեց արխիվի տնօրենը:
Նշենք, որ համագործակցության համաձայնագիր ստորագրելու նախաձեռնությունը ֆրանսիական կողմինն է: Դեռևս 2018 թվականին Շոահի հուշահամալիր-հիմնադրամի ներկայացուցիչները տնօրեն Ժաք Ֆրեջի գլխավորությամբ այցելել էին Հայաստան: Հանդիպելով Հայաստանի ազգային արխիվի տնօրեն Ամատունի Վիրաբյանի հետ` հանդես են եկել երկկողմ համագործակցություն իրականացնելու առաջարկով:
Համաձայնագիրը, որը բաղկացած է հինգ հոդվածից, ստորագրվեց հինգ տարի ժամկետով, սակայն կողմերի համաձայնությամբ, կարող է երկարաձգվել ևս հինգ տարով: