ԵՐԵՎԱՆ, 23 սեպտեմբերի — Sputnik. Սեյսմիկ ակտիվությունը Հայաստանի հյուսիս-արևմտյան շրջաններում, որտեղ վերջերս ստորգետնյա ցնցումներ են գրանցվել, հետզհետե մարում է։ Այս մասին Sputnik Արմենիայի թղթակցի հետ զրույցում ասաց «Սեյսմիկ պաշտպանության տարածքային ծառայություն» ՊՈԱԿ-ի նախագահ Սոս Մարգարյանը։
Հիշեցնենք, որ հունիսի 10-ին, 20:22-ին երկրաշարժ էր գրանցվել Հայաստան-Վրաստան սահմանային գոտում՝ Բավրա գյուղից 13 կմ հյուսիս-արևելք։ Էպիկենտրոնում ստորգետնյա ցնցման ուժգնությունը կազմել էր 6-7 բալ: Ցնցումներ են արձանագրվել ՀՀ Շիրակի, Լոռու, Տավուշի, Արագածոտնի, Արմավիրի մարզերում և Երևան քաղաքում: Սեպտեմբերի 19-ին, ժամը 22:42-ին Շիրակի մարզի տարածքում ևս մեկ երկրաշարժ է գրանցվել։
Դա բնակչության շրջանում խուճապային տրամադրություն է առաջացրել ու սոցցանցերում մեծ իրարանցում է բարձրացրել։
«Գիտեք, որ մենք ակտիվ սեյսմիկ գոտում ենք ապրում։ Ամբողջ Կովկասն ու Հայաստանը, մասնավորապես։ Ինչ վերաբերում է հանրապետության հյուսիս-արևմուտքում վերջերս եղած ցնցումներին, ապա այստեղ բեկման գիծն է։ Այստեղ կարող են հաճախակի փոքր ուժգնության երկրաշարժեր լինել։ Վերջին ցնցումները հենց այդպիսին էին։ Դրանք բնորոշ են այս շրջանի համար»,- նշեց Մարգարյանը։
«Սեյսմիկ պաշտպանության տարածքային ծառայություն» ՊՈԱԿ-ն ամեն օր ուսումնասիրում է Հայաստանի ու հարևան երկրների տարածքի սեյսմիկ ակտիվությունը, գեոֆիզիկական ու գեոքիմիական լարվածությունը։
«Շատ դժվար է կանխատեսել՝ երբ կլինեն ցնցումները։ Սակայն այս պահին մեր հետազոտությունները ցույց են տալիս, որ անհանգստանալու առիթ չկա։ Այժմ այդ ցնցումների օջախային գոտում լարվածությունը թուլացել է», - ասաց մասնագետը։
ՊՈԱԿ-ը վերջին երկրաշարժի ժամանակ մասնագետների խմբեր էր ուղարկում ցնցումների գոտի։ Կենտրոնի գործառույթներից մեկն է բնակչությանը ցնցումների ժամանակ պաշտպանվելու հմտություններ սովորեցնելը։ Մարգարյանը խոստովանում է, որ երկրաշարժը զգացած բնակավայրների բնակիչները մի քիչ վախեցած ու անհանգստացած էին, սակայն, ընդհանուր առմամբ, նրանք պատրաստ են նման իրավիճակներին։