ԵՐԵՎԱՆ, 18 սեպտեմբերի — Sputnik. Հայաստանի ԱԳՆ ղեկավար Զոհրաբ Մնացականյանը պաշտոնական այցով մեկնել է Լատվիա, որտեղ հանդիպել է նոր նախագահ Էգիլս Լևիտսի, խորհրդարանի նախագահ Ինարա Մուրնիեցեի, Լատվիայի արտգործնախարար Էդգարս Ռինկևիչսի հետ։ Այդ մասին հաղորդում է Sputnik Լատվիան։
Այցի ոչ պաշտոնական մասի ընթացքում Մնացականյանը Բալթյան երկրներում Հայաստանի դեսպան Տիգրան Մկրտչյանի հետ այցելել է Ռիգայի Սուրբ Գրիգոր Լուսավորիչ եկեղեցի, որտեղ նրանց դիմավորել է քահանա Տեր–Խոսրով Ստեփանյանը։
Մինչև նախարարի հետ հանդիպումը Տեր–Խոսրովը լրագրողներին ասել էր, որ այդաստիճան պատվավոր հյուրերի այցերն իսկապես անհրաժեշտ են Լատվիայի հայկական սփյուռքի համար։
Մնացականյանի հետ հանդիպմանը ներկա էին հայկական սփյուռքի տարբեր ներկայացուցիչներ։ Սկզբում նրանք մասնակցել են եկեղեցում մատուցված կարճ պատարագին, այնուհետև սեղանի շուրջ շփվել, որտեղ կիրակնօրյա դպրոց է գործում Լատվիայի հայ համայնքի երեխաների համար։
Ի դեպ, հայկական սփյուռքի բոլոր ներկայացուցիչներն ասում էին, որ Լատվիայում սպասում են, թե երբ վերջապես ուղիղ ավիաչվերթ կլինի Ռիգայի և Երևանի միջև։ Եվ, իհարկե, կարևոր է, որպեսզի չեղարկվի վիզայի ռեժիմը։
«Ցանկանում եմ շնորհակալություն հայտնել Լատվիայի կառավարությանը, այն հյուրընկալ մթնոլորտի համար, որն այստեղ վայելում են մեր հայրենակիցները: Ինձ համար իրապես շատ հուզիչ էր այստեղ՝ Ռիգայում, տեսնել հայկական գեղեցիկ եկեղեցի: Լատվիայի հայ համայնքի ներկայացուցիչները Լատվիային նվիրված հայրենասերներ են, որոնք միաժամանակ հպարտորեն են կրում իրենց ազգային ինքնությունը: Նրանք մեծ ներդրում ունեն մեր ժողովուրդներին բարեկամական ոգով կամրջելու և մերձեցման մեջ», – ասել է Մնացականյանը։
Նա հավելել է, որ Հայաստանը քաղաքական և դիվանագիտական մակարդակում ամեն ինչ կանի, որպեսզի հայկական սփյուռքի ներկայացուցիչները ոչ միայն լավ ապրեն այն երկրում, որտեղ նրանց տունն է, այլ նաև իմանան, որ միշտ կարող են հույսը դնել Հայաստանի աջակցության վրա։