ԵՐԵՎԱՆ, 11 սեպտեմբերի — Sputnik. Հայկական բնապահպանական ճակատը «Ամուլսարը սար է մնալու» խորագրով քայլերթ է իրականացվում Երևանում` Ամուլսարի շահագործման դեմ։ Քայլերթը մեկնարկեց Ազգային ժողովի դիմացից:
Նշենք, որ բողոքի ակցիա անողներին ոստիկանները թույլ չէին տալիս մտնել Ազգային ժողովի բակ։
ԱԺ նախագահ Արարատ Միրզոյանը մոտեցավ նրանց ու բացատրեց, որ Ազգային ժողովը հատուկ պահպանվող տարածք է, դրա համար էլ փակել են դռները։ Արարատ Միրզոյանի` բողոքի ակցիա անողների հետ կարճ զրույցից հետո ԱԺ բակի դռները բացվեցին ու ցուցարարները մտան բակ։
«Մենք հետքայլ անողը չենք». ջերմուկցիները կբանակցեն միայն Ամուլսարի փակման համար
Այնուհետև «Քանի կանք, ոչ մի հանք» վանկարկումներով երթն Ազգային ժողովի բակից շարժվեց դեպի Հանրապետության հրապարակ:
«Հայտարարում ենք, որ Նիկոլ Փաշինյանը, գոյություն ունեցող և բազմիցս ներկայացված փորձագիտական և իրավական հիմքերն անտեսող այս որոշմամբ, բազմաթիվ օրինախախտումներ ու թերություններ ունեցող ծրագիր կյանքի կոչելու թողտվությամբ՝ բարձրագույն մակարդակով իրականացնում է մասնավոր ընկերության հովանավորչություն, ինչը ժողովրդի վստահության և պաշտոնեական լիազորությունների չարաշահման աղաղակող փաստ է»,–մինչև երթը հայտարարել էր ՀԲՃ–ն։
Հիշեցնենք, որ ՀՀ վարչապետ Նիկոլ Փաշինյանը սեպտեմբերի 9–ին Facebook–յան ուղիղ եթերում անդրադարձել էր Ամուլսարի հանքի շահագործման թեմային` ասելով, որ Ջերմուկի բնակիչները պետք է ապաշրջափակեն Ամուլսարի հանք տանող ճանապարհները:
Ավելի վաղ լիբանանյան «Էլարդ» ընկերությունն Ամուլսարի հանքի շահագործման ընթացքում իրականացրել էր շրջակա միջավայրի ռիսկերի գնահատում: Ընկերության ներկայացուցիչները ուսումնասիրել են դեռևս 2016 թ.-ին «Լիդիան Արմենիա» ընկերության կողմից պատրաստված շրջակա միջավայրի վրա ազդեցության գնահատումը և հայտարարել հնարավոր ռիսկերի մասին: Միևնույն ժամանակ, Հայաստանի քննչական կոմիտեի ներկայացուցիչները նշել են, որ ռիսկերը կառավարելի են:
Աղաբալյան. «Եթե վարչապետը չունի մասնագետ, մնում է` պատասխան ստանա Google-ից»
Ջերմուկի բնակիչները դեռևս նախորդ տարվանից պարբերաբար փակում են դեպի Ամուլսար տանող ճանապարհները: Նրանք կարծում են, որ հանքի շահագործումը մեծ վնաս կհասցնի շրջակա միջավայրին:
Ամուլսարի ոսկու հանքը Հայաստանի երկրորդ խոշոր հանքավայրն է: Այն ղեկավարում է «Լիդիան Արմենիա» ՓԲԸ-ն, որը միջազգային Lydian international ընկերության դուստր ձեռնարկությունն է: