ԵՐԵՎԱՆ, 31 օգոստոսի – Sputnik. Հայաստանը տնտեսապես հզորացնելու ճանապարհը արտադրությունն է։
Այս մասին այսօր ասել է ՀՀ վարչապետ Նիկոլ Փաշինյանը արտահանողների, նաև տնտեսության տարբեր ճյուղերում գործունեություն ծավալող գործարարների հետ հանդիպման ժամանակ. այս մասին տեղեկացնում է կառավարության մամուլի ծառայությունը։
«Մենք ուզում ենք, որ դուք ավելի շատ արտադրեք, ավելի շատ արտահանեք, բնականաբար, ավելի շատ եկամուտ ստանաք, ավելի շատ հարկ վճարեք և այսպես շարունակ»,– ասել է Փաշինյանը:
Վարչապետը նաև կարևորել է «առանց բացառության բոլոր խաղացողների և գործող անձանց համար» աշխատելու հավասար պայմաններ ստեղծելը։
Նա ընդգծել է կառավարության և գործարարների միջև փոխգործակցությունը` նշելով, որ սովորաբար կառավարությունը մշակում է համապատասխան քաղաքականություն, տալիս է ոլորտին և ասում՝ այսպես պետք է աշխատել։ Արդյունքում գործընթացն արհեստական է ստացվում, անհրաժեշտ է ստեղծել փոխհամագործակցության այնպիսի մթնոլորտ, որ կայացված որոշումները նույնքան հարազատ լինեն կառավարության և ոլորտների ներկայացուցիչների համար։ Նա նշել է, որ կառավարությունը բաց է համագործակցության համար։
Մեղրին տապալվե՞ց, Գյումրին կհաջողի՞. ազատ տնտեսական գոտիների հին ու նոր պատմությունները
«Մեր աշխատանքի տրամաբանությունը կրկին գալիս հանգում է այդ նույն կարգախոսին` հարստացեք և հարստացրեք: Հարստանալը ձեր պարագայում, բնականաբար, եկամուտ, մեր պարագայում` ավելի շատ հարկեր ստանալն է, որպեսզի կառավարությունն ավելի մեծ հնարավորություններ ունենա նաև բարելավելու այն միջավայրը, որում դուք աշխատում եք»,– ասել է նա:
Վարչապետ Փաշինյանը նկատել է, որ «Մուդիզ» միջազգային վարկանիշային կազմակերպության կողմից Հայաստանի վարկանիշը «B1»-ից «Ba3» բարձրացնելու գործում կարևորագույն արձանագրումներից մեկն այն է, որ մեր երկրի տնտեսության մեջ տեղի է ունենում դիվերսիֆիկացիայի պրոցես, ըստ նրա` նախկինի նման կախվածություն չունենք: Կառավարության ղեկավարը և գործարարները տնտեսության խթանման գործում կարևորել են նաև հողային ռեֆորմի իրականացումը բոլոր ոլորտների համար` գյուղատնտեսությունից մինչև արդյունաբերություն:
Հանդիպման ընթացքում քննարկվել են նաև պետական գնումների համակարգի վերադասավորմանը, պետական պատվերի ժամկետի երկարաձգմանը, տարբեր արտադրատեսակների արտահանման ծավալների ավելացման հնարավորություններին, կառավարության աջակցության, խթանման գործողություններին, շուկայում հավասար պայմանների ապահովմանը, բանկերի հետ համագործակցությանը, վարկային տոկոսադրույքներին և այլ խնդիրներին վերաբերող հարցեր:
Հանդիպման արդյունքներով պայմանավորվածություն է ձեռք բերվել, ըստ որի` Էկոնոմիկայի նախարարության պատասխանատուները տարբեր ոլորտների ներկայացուցիչների հետ հանդիպումներ կունենան երկշաբաթյա կտրվածքով` խնդիրներին առավել առարկայական և կոնկրետ լուծումներ գտնելու նպատակով: