ԵՐԵՎԱՆ, 30 օգոստոսի — Sputnik. Եթե հարկեր թաքցրած լինեի, հիմա ինձ գնդակահարել էին։ Այսօր դատարանում, դատական նիստի ընդմիջմանը, լրագրողների հետ զրույցում ասաց «Ֆլեշ» ՍՊԸ նախագահ Բարսեղ Բեգլարյանը։
«Ես ոչ մի վտանգ չեմ զգում, ես հավատացած եմ, որ արդարությունը հաղթելու է»,– ասաց նա։
Բարսեղ Բեգլարյանը հաստատեց, որ ՊԵԿ աշխատակիցները եղել են ընկերությունում, ստուգումներ իրականացրել։ Բայց հարկային պարտավորությունների վերաբերյալ քրեական գործի հարուցման մասին լուրերը ընկերության նախագահը հերքեց։
Հիշեցնենք` Բարսեղ Բեգլարյանն ու ընկերության բազայի պետ Հրայր Հովսեփյանը մեղադրվում են բռնության գործադրմամբ զուգորդված ինքնիրավչության համար։
Բարսեղ Բեգլարյանը Սեյրան Օհանյանին 28 հազար դոլար է տվե՞լ. Բեգլարյանն այլ բան է պնդում
Ըստ մեղադրանքի` Բեգլարյանը և ընկերության այլ պաշտոնատար անձինք «Ֆլեշ Մոտորս» ՍՊ ընկերության նախկին կոմերցիոն տնօրենին և այլ աշխատակիցների մեղադրել են ընկերությանը գույքային վնաս պատճառելու մեջ ու պահանջել են վերականգնել այն, ինչպես նաև սպառնացել են բռնության ենթարկել, ինչի հետևանքով նախկին կոմերցիոն տնօրեն Արման Մկրտումյանը իր բնակարանը 2016 թվականի ապրիլին գրավադրել է և գրավի դիմաց ստացած 9.700.000 ՀՀ դրամը փոխանցել է ընկերությանը:
Նշենք, որ այս մեղադրանքը Բարսեղ Բեգլարյանը չի ընդունում։