ԵՐԵՎԱՆ, 27 օգոստոսի — Sputnik. ՀՀ պետական եկամուտների կոմիտեի նախկին նախագահ, ՀՀ ֆինանսների նախկին նախարար Գագիկ Խաչատրյանը ձերբակալվել է։ Այս մասին հայտնում է ՀՀ Ազգային անվտանգության ծառայությունը։
Արդեն հայտնել էինք, որ Գագիկ Խաչատրյանին պատկանող տանն այսօր ԱԱԾ–ն խուզարկություն էր կատարել։
«Խուզարկությունների ավարտից հետո, Գագիկ Խաչատրյանը և Կարեն Խաչատրյանը (խմբ.–ՀՀ ՊԵԿ նախկին բարձրաստիճան պաշտոնյա է, Գագիկ Խաչատրյանի ազգականը) ՀՀ քրեական օրենսգրքի 308-րդ հոդվածի 2-րդ մասով և 179-րդ հոդվածի 3-րդ մասի 1-ին կետով նախատեսված հանցագործությունների (ծանր հետևանքների առաջացմամբ զուգորդված պաշտոնեական դիրքի չարաշահում և առանձնապես խոշոր չափերով գույքի վատնում) կատարման կասկածանքով բերման են ենթարկվել ՀՀ ԱԱԾ քննչական դեպարտամենտ։ Նրանք ձերբակալվել են»,–նշված է ԱԱԾ հաղորդագրության մեջ։
ԱԱԾ–ն հայտնում է նաև, որ այսօր Խաչատրյանին պատկանող տարածքներում տեղի ունեցած խուզարկությունն իրականացվել է դեռևս 2019–ի փետրվարի 2-ին հարուցված քրեական գործի շրջանակներում։ Տևական ժամանակ ձեռնարկված լայնածավալ օպերատիվ-հետախուզական միջոցառումների և քննչական գործողությունների արդյունքում ձեռք բերված փաստական տվյալների հիման վրա էլ այսօր խուզարկություններ են կատարվել ինչպես Գագիկ Խաչատրյանի, այնպես էլ վերջինիս հետ փոխկապակցված մի շարք անձանց առանձնատներում և բնակարաններում, այդ թվում` ՀՀ ՊԵԿ նախկին բարձրաստիճան պաշտոնյա Կարեն Խաչատրյանի տանը։
Գագիկ Խաչատրյանի դեմ քրգործով 800 միլիոն դրամի վերականգնում է եղել. մանրամասներ
Հիշեցնենք, որ ԱԱԾ տնօրեն Արթուր Վանեցյանը հայտնել էր, որ խուզարկությունից հետո Խաչատրյանը բերման կենթարկվի։
ՀՀ հատուկ քննչական ծառայության մամուլի քարտուղար Մարինա Օհանջանյանը Sputnik Արմենիային հայտնել էր, որ Խաչատրյանը Հատուկ քննչական ծառայությունում քննվող քրեական գործով մեղադրյալի կարգավիճակ ունի: Ըստ ՀՔԾ–ի` Խաչատրյանը մեղադրվում էր ՀՀ քրեական օրենսգրքի 179–րդ հոդվածի 3-րդ մասի 1-ին կետով, այն է` առանձնապես խոշոր չափերի վատնումը։ Խաչատրյանի դեմ հարուցված քրեական գործով 800 միլիոն դրամի վերականգնում է եղել: