ԵՐԵՎԱՆ, 26 օգոստոսի — Sputnik. ՀՀ քննչական կոմիտեի Վայոց Ձորի մարզային քննչական վարչությունում վարույթ է ընդունվել Գնդեվազ գյուղում տեղի ունեցած խուլիգանության դեպքի առթիվ հարուցված քրեական գործը:
Այս մասին տեղեկացնում են ՀՀ քննչական կոմիտեի մամուլի ծառայությունից։
Ինչպես արդեն տեղեկացրել էինք, 2019թ. օգոստոսի 25-ին 57-ամյա տղամարդը ՀՀ ոստիկանության Ջերմուկի բաժնում հաղորդում է տվել այն մասին, որ մի խումբ անձինք Գնդեվազ գյուղում ծեծի են ենթարկել իրեն:
Հաղորդման հիման վրա նյութերի նախապատրաստման ընթացքում պարզվել է, որ 2019 թ. օգոստոսի 24-ին, ժամը 22:30-ի սահմաններում, 57-ամյա տղամարդը դիտողություն է արել Գնդեվազ գյուղի կենտրոնական հրապարակում «Ամուլսարն առանց հանքի» բարձր ձայնով վանկարկումներ անող մի խումբ անձանց:
Նրանցից մեկը՝ Կեչուտի 24-ամյա բնակիչը, ցավագին ընդունելով դիտողությունը, խուլիգանական մղումներով, մի քանի այլ երիտասարդների հետ ծեծի է ենթարկել նրան, ինչպես նաև հնչեցրել հայհոյանքներ:
Դեպքի առթիվ ՀՀ ոստիկանության Ջերմուկի բաժնում հարուցվել է քրեական գործ:
Քրեական գործով ձեռնարկված անհրաժեշտ միջոցառումների արդյունքում 24-ամյա երիտասարդը ձերբակալվել է: Որոշում է կայացվել միջադեպի մասնակիցներից ևս մեկին՝ 22-ամյա երիտասարդին, ձերբակալելու մասին, որի կատարումը հանձնարարվել է ոստիկանության համապատասխան ստորաբաժանմանը:
Պետական մարմինները կարող են արգելել հանքի շահագործումն ու «Լիդիանին» զրկել լիցենզիայից. ՔԿ
Նախաքննությունը շարունակվում է: Միջոցներ են ձեռնարկվում՝ միջադեպին մասնակից այլ անձանց ինքնությունը պարզելու, նրանց հայտնաբերելու և վարույթն իրականացնող մարմնին ներկայացնելու ուղղությամբ: