ԵՐԵՎԱՆ, 25 օգոստոսի — Sputnik. Շախմատի միջազգային ֆեդերացիան (FIDE) ուսումնասիրում է շախմատի կանանց Հայաստանի հավաքականի անդամ Մարիա Գևորգյանի՝ Թուրքիայի մրցաշարի մասնակիցների թվից ադրբեջանցիների պահանջով հեռացնելու միջադեպը:
«FIDE-ն գործին ընթացք է տվել: Դեպքը մանրամասն ուսումնասիրվում է: Մեղավորները խստագույնս կպատժվեն»,- այս մասին սոցցանցային իր էջերում գրել է FIDE-ի ներկայացուցիչ Էմիլ Սուտովսկին:
Հիշեցնենք, որ օգոստոսի 18-ին Թուրքիայում կայանալիք Sivas Buruciye Сhess Open 2019 միջազգային մրցաշարին շախմատի Հայաստանի գործող չեմպիոն Մարիա Գևորգյանին մասնակցության հրավեր ուղարկելուց օրեր անց մրցաշարի թուրք կազմակերպիչ Մուսթաֆա Էրոգլուն խնդրել է հրաժարվել մասնակցությունից` ադրբեջանցիների պահանջով: Այդ թվում թուրք կազմակերպիչը հրաժարվել է Հայաստանի ներկայացուցչի մասնակցության ծախսերը հոգալ:
Ավելի վաղ գրել էինք, որ Հայաստանի շախմատի ֆեդերացիան իր վերաբերմունքը հայտնել էր տեղի ունեցածի նկատմամբ և մտադիր էր բողոքով դիմել FIDE։