ԵՐԵՎԱՆ, 23 օգոստոսի — Sputnik. Մարդու իրավունքների պաշտպանն աշխատանքային խումբ է գործուղել Ջերմուկ` Ամուլսարի հանքի շահագործման հետ կապված իրադարձություններին տեղում ծանոթանալու նպատակով։ Այդ մասին հայտնում է ՄԻՊ Facebook-ի էջը։
«Այցի ընթացքում նախատեսվում են քննարկումներ Գնդևազ համայնքի բնակիչների, Ամուլսարի հանքի չշահագործման համար տարածքում հերթապահություն իրականացնող քաղաքացիների, քաղաքացիական հասարակության ներկայացուցիչների հետ։ Առանձին քննարկումներ տեղի կունենան նաև Ջերմուկի համայնքապետարանում»,– ասված է հաղորդագրության մեջ։
ՄԻՊ գրասենյակը նաև հայտնում է, որ դիտարկումն իրականացվում է քաղաքում ոստիկանական ուժերի կուտակումների մասին լրատվամիջոցների և սոցիալական ցանցերի հրապարակումները հաշվի առնելով։ Այս հարցով պաշտպանի աշխատակազմի թեժ գծին միայն օգոստոսի 22-ին Ջերմուկի բնակիչներից 3 ահազանգ է ստացվել։
Ամուլսարը մտել է իշխանության «մատի ու մատանու արանքը». ի՞նչ է կատարվում «Իմ քայլում»
Նշենք, որ րոպեներ առաջ ՀՀ վարչապետ Նիկոլ Փաշինյանը ևս հայտնել էր, որ ուղղաթիռով մեկնում է Ջերմուկ։ Նրան ուղեկցում է Տարածքային կառավարման և ենթակառուցվածքների նախարար Սուրեն Պապիկյանը։