ԵՐԵՎԱՆ, 20 օգոստոսի - Sputnik. Այն համառությունը, որով Հանրապետական կուսակցության որոշ ներկայացուցիչներ պնդում են ՀՀԿ առաջնորդ, նախկին նախագահ Սերժ Սարգսյանի առաջիկա ձերբակալման մասին, որոշ մտորումներ է առաջացնում։ Վարկած կա, որ նման խուճապային տրամադրությունների միջոցով հանրապետականները կա՛մ ուզում են կանխել Սարգսյանի քրեական հետապնդումը, կա՛մ եթե այն իրականություն դառնա, լրացուցիչ միավորներ ստանալ ներկայիս իշխանության ներկայցուցիչների դեմ պայքարում։ Ցանկացած դեպքում սա նրանց համար շահավետ ելք կլինի։
Հայաստանի երրորդ նախագահի քրեական «շահառուներ» կան նաև իշխանության ներկայացուցիչների մեջ։ Երկրի ղեկավարությունը շատ բարդ խնդիրների ու մարտահրավերների առջև է հայտնվել։ Առանցքային խնդիրն, իհարկե, Ամուլսարի հանքի շուրջ ստեղծված իրավիճակն է։ Թույլ տալով շահագործել այն` իշխանությունը կարժանանա հասարակության լայն շրջանի վրդովմունքին։ Ու այժմ կառավարությունը պետք է մտածի` ինչպես կառավարի այդ դժգոհությունն ու խուսափի ներքին ցնցումներից։
Իշխանության համար ևս մեկ տհաճ պատմություն է երկրորդ նախագահ Ռոբերտ Քոչարյանի քրեական հետապնդումը։ Գործընթացը կանգ առավ այն բանից հետո, երբ դադարեցվեցին գործը քննող դատավոր Դավիթ Գրիգորյանի լիազորությունները։
Վերջինս ինքն է քրեական գործի մասնակից դարձել։ Այս պայմաններում պաշտպանությունը պահանջում է հնարավորինս արագ ազատ արձակել Քոչարյանին։ Նման դիրքորոշում ունեն նաև եվրոպական իրավունքի ոլորտի փորձագետները։ Նրանք նշում են, որ այն պայմաններում, երբ պետությունը չի կարող ապահովել դատական հետաքքնությունը, իսկ Քոչարյանի կալանքի ժամանակային սահմաններն անորոշ են, նրան պետք է ազատ արձակել կալանավայրից։ Դա չի արվում մի շարք պատճառներով․ իշխանությունը չափազանց շատ պաշար է ծախսել Քոչարյանի գործի վրա, որ հիմա պարզապես փակի այն, ու այժմ իշխանությանն օգնության է հասնում ՀՀԿ առաջնորդը` Քոչարյանի հետ «տեղերով փոխվելով»։
Բաց թողնելով երկրորդ նախագահին ու նստեցնելով երրորդին`իշխանությունը միանգամից մի քանի խնդիր կլուծի։ Ակնհայտ է, որ հայկական Թեմիսը չգիտի` ինչ ուղղությամբ տանի քրեական գործը. կալանքի տակ պահելու պաշտոնական հիմքերը սպառվել են, իսկ ազատ արձակելը կարող է ազդել իշխանության վարկանիշի վրա։ Որոշակի «շանթարգել» է պետք, ու երրորդ նախագահը կկատարի այդ դերը։
«Եվ հետո, Սարգսյանին «նստեցնելը» թույլ կտա Նիկոլ Փաշինյանի կառավարությանը՝ թեթեևացնել Ամուլսրի հետ կապված լարվածությունը։ Մյուս կողմից էլ դա թույլ կտա նոր կյանք ներշնչել Հանրապետական կուսակցության մեջ, որը վերջին տարվա ընթացքում զգալիորեն թուլացել է։
Քաղտեխնոլոգ Արմեն Բադալյանի խոսքով` հանրապետականներն իրենց որպես «զոհ» են առաջարկում ու դրա համար լուրջ պատճառներ ունեն։ Վաղ թե ուշ Սարգսյանն ու նրա թիմը պետք է հաշվետվություն ներկայացնեն քաղաքացիներին իրենց օրոք եղած թերացումների ու բացթողումների համար։
«Փաշինյանը, հակառակ սպասումների, նման հաշվետվություն չի պահանջել ՀՀԿ–ից ու նրա առաջնորդից։ Սերժ Սարգսյանի մոտ ազգականները, լինելով քրեական գործերի մասնակիցներ, հանգիստ լքում են Հայաստանը, իսկ զարմիկներից մեկն ամիսներ շարունակ Պրահայում է ու նրան դեռ չեն շտապում արտահանձնել։ Կարծում եմ` այդ ամենն իր պատճառներն ունի», – Sputnik Արմենիայի թղթակցի հետ զրույցում ասաց Բադալյանը։
Այս պատճառով, նրա կարծիքով՝ Սերժ Սարգսյանի ձերբակալումը գործող իշխանության համար վարկանիշի թեև ժամանակավոր, բայց փրկություն կլինի։ Մեր զրուցակիցը կարծում է, որ հանրապետականների համար իրենց առաջնորդի ձերբակալումը կդառնա քաղաքական «վերակենդանացման» գործիք։
«Սարգսյանին ուղղված քաղաքական հարցերն օրակարգից հանելու համար պետք է նրա համար քաղբանտարկյալի կերպար ստեղծել։ »դա, իհարկե, չի նշանակում, որ նրան իսկապես դատելու են», – ասաց Բադալյանը։
Փորձագետը կարծում է, որ ժամանակի ընթացքում այդ գործը «լղոզելու» միջոցներ ու մեխանիզմներ կգտնվեն։ Բայց հիմա ամենակարևորը ռումբի պայթյունի էֆեկտ ապահովելն է։
Ռոբերտ Քոչարյանի փաստաբանները 7-րդ գանգատն են ներկայացրել ՄԻԵԴ
Հիշեցնենք` Վատիկանում Հայաստանի նախկին դեսպան Միքայել Մինասյանն ընդարձակ հարցազրույց էր տվել՝ նշելով նաև, որ առաջիկայում հնարավոր է նոր ձերբակալումներ լինեն ու կարող են ձերբակալվել ինչպես երրորդ նախագահ Սերժ Սարգսյանը, այնպես էլ նրա գեներալներն ու ինքը։ Հիշեցնենք` Մինասյանը Սերժ Սարգսյանի փեսան է։