ՀՅԴ Բյուրոյի տնտեսական հետազոտությունների գրասենյակի ծրագրերի համակարգող, տնտեսագիտության թեկնածու Թադևոս Ավետիսյանը կարծում է, որ թոշակների ու նպաստների համակարգերում կոռուպցիոն ռիսկերը խորանում են այն պարզ պատճառով, որովհետև առկա խնդիրները չեն լուծվում:
«Դրանք պարբերաբար հետաձգվում են այս կամ այն, հիմնականում անհասկանալի, պատճառներով, իսկ խորքային առումով համակարգը չի կառավարվում այն աստիճան արդյունավետ, որ ի հայտ եկած խնդիրներն ավելի արագ լուծվեն, և ժամանակ մնա նաև համակարգային բարեփոխումների համար»,- նշում է Թադևոս Ավետիսյանը:
Տնտեսագետի կարծիքով՝ սոցիալական նպաստների համակարգը հիմնված է մարդկանց, ընտանիքների անապահովության գնահատման վրա: Ընդ որում՝ գնահատման գործիքն ամբողջ սոցիալական քաղաքականության հիմքում է, և այդ գործիքը, լինելով նշված քաղաքականության առանցքը, խնդրահարույց է, որովհետև այդտեղ գնահատումները կատարվում են անուղղակի մեթոդներով ու ցուցիչներով: Օրինակ՝ թե որքան գազ կամ էլեկտրաէներգիա է սպառել տվյալ ընտանիքը, մեքենա գնե՞լ է, թե՞ ոչ, մաքսազերծում իրականացրե՞լ է, թե՞ ոչ:
«Սա չի կարող տալ օբյեկտիվ արդյունք, ինչի այլընտրանքն ուղղակի գնահատման մեթոդն է, երբ մարդկանց եկամուտներն ու նվազագույն ծախսերն են համադրվում, ինչն անհրաժեշտ է նրանց կենսապահովման համար, և որոշում են, թե տվյալ ընտանիքը մեկ շնչի հաշվով գոնե նվազագույն ծախսերին համարժեք եկամուտներ ունի՞, թե՞ ոչ: Իսկ դրա համար անհրաժեշտ է ներդնել եկամուտների հայտարարագրման համակարգը, ինչի մասին իշխանությունները բազմաթիվ առիթներով նշել են ու կարևորել: Այդուհանդերձ փաստն այն է, որ նշված համակարգը չկա, և շարունակվում է կիրառվել անուղղակի գնահատման համակարգը»,- նշում է Թադևոս Ավետիսյանը:
200 000 մարդ պոլիկլինիկաներից անվճար դեղորայք կստանան
Անդրադառնալով որոշ քաղաքացիների կողմից եկամուտները թաքցնելու խնդրին՝ տնտեսագետը նշում է, որ աշխարհում վաղուց կիրառվում է հետևյալ փորձը. համատարած հայտարարագրման պարագայում այլևս անհնար է դառնում որևէ մեկի կողմից եկամուտների թաքցնումը: