ԵՐԵՎԱՆ, 16 օգոստոսի — Sputnik. Իտալիայի 57-ամյա քաղաքացին իր դեմ հարուցված քրգործի վարույթը կարճելու համար փորձել է կաշառել ՀՀ ՊԵԿ պաշտոնյային, սակայն միջնորդն ինքն է յուրացրել 5 մլն դրամը։ Այս մասին տեղեկանում ենք ՀՀ քննչական կոմիտեի կայքից։
«Իտալական ընկերության հայաստանյան մասնաճյուղի տնօրենն իմացել է, որ իր ղեկավարած ընկերության վերաբերյալ հարկերից խուսափելու համար քրգործ է հարուցվել։ Նա իր տնօրինած մեկ այլ ՍՊ ընկերության փոխտնօրեն, ՀՀ քաղաքացուն խնդրել է գտնել միջնորդի, որպեսզի քրգործով վարույթը կարճելու համար կաշառի քրգործով իրավասություն ունեցող պաշտոնատար անձին»,–գրված է հաղորդագրության մեջ։
Փոխտնօրենը, հարկային տեսուչի հետ լավ հարաբերությունների մեջ լինելով, 2018–ի օգոստոսի 5-ին պայմանավորվել և օրեր անց Երևանի սրճարաններից մեկում հանդիպել է նրան։ Այդ ընթացքում իտալացի գործարարի անունից հարկային տեսուչին խնդրել է օգնել քննվող քրգործով վարույթը կարճելու հարցում՝ հայտնելով, որ իտալացի իր ղեկավարը պատրաստ է նաև կաշառք տալ։
Իր հերթին հարկային տեսուչը փոխտնօրենին հայտնել է, որ մտերիմ է ՊԵԿ քննչական վարչության պաշտոնյայի հետ ու կարող է նպաստել կաշառքի շուրջ համաձայնության գալուն ու առանձնապես խոշոր չափերով՝ 5 մլն ՀՀ դրամ է պահանջել։ Այդ գումարի դիմաց էլ ՊԵԿ պաշտոնյան, իբր, հետամուտ պետք է լիներ քրեական գործով վարույթի կարճմանը։
Փոխտնօրենը 2018–ի օգոստոսի ընթացքում իտալացի գործարարից ստացել և հարկային տեսուչին է փոխանցել 5 մլն դրամը, որը վերջինս խարդախությամբ հափշտակել է։ Ստացվում է, որ գործարարն իր կամքից անկախ հանգամանքներով չի կարողացել ավարտին հասցնել հանցագործությունը՝ միջնորդի միջոցով առանձնապես խոշոր չափերով կաշառք տալ ՊԵԿ պաշտոնատար անձին։
Ձեռք բերված բավարար ապացույցների համակցությամբ՝ Իտալիայի քաղաքացուն մեղադրանք է առաջադրվել՝ ՀՀ քրեական օրենսգրքի 34-312-րդ հոդվածի 3-րդ մասի 1-ին կետով, այն է` կաշառք տալը: Նրա նկատմամբ որպես խափանման միջոց է ընտրվել ստորագրություն՝ չհեռանալու մասին:
Հայտարարվել է նախաքննության ավարտի մասին, և քրեական գործը՝ մեղադրական եզրակացությամբ, ուղարկվել է դատարան: