ԵՐԵՎԱՆ, 16 օգոստոսի — Sputnik. Համահայկական ամառային 7-րդ խաղերի շրջանակում անցկացվել է արդեն ավանդականի դարձած գեղեցկության մրցույթը: Գեղեցկուհու տիտղոսի համար պայքարել է 13 մասնակից:
«Այստեղ օդն ուրիշ է». ինչպես վրացին սիրեց Հայաստանն ու Արցախը, իսկ մյուսները տուն գտան
«14 մինչև 32 տարեկան մասնակիցներ ունենք այս մրցույթում: Խաղերի շրջանակում ձևավորված գեղեցիկ ավանդույթներից է գեղեցկության մրցույթը: Այն հնարավորություն է տալիս սպորտը համադրել գեղեցկության հետ»,- ասաց Համահայկական խաղերի համաշխարհային կոմիտեի անդամ Պերճ Հալաջյանը:
Համահայկական խաղերի համաշխարհային կոմիտեի կողմից ընտրված ժյուրին գնահատել է ոչ միայն մասնակիցների արտաքին տեսքը, այլև ինտելեկտը։ Սպորտի, գեղեցկության ու գիտելիքների համադրությամբ հաղթող է ճանաչվել Ռոստովի «Ջանֆիդա» վոլեյբոլի թիմը ներկայացնող 25-ամյա Աննա Թունյանը:
«2-րդ անգամ եմ մասնակցում Համահայկական խաղերին, իսկ գեղեցկության մրցույթին` առաջին անգամ: Չնայած լարվածություն կար, բայց նաև հաճելի էր մասնակցությունը»,- մրցույթից հետո իր տպավորությունները պատմեց Թունյանը:
Խնամիություն ենք անելու. Համահայկական խաղերի մասնակիցները կապեր են հաստատում իրար հետ
Երկրորդ հորիզոնականում Արմինե Գալստյանն է։ Նա ևս Ռոստովն է ներկայացնում։ Երրորդ տեղում ընտրվել է Արցախը ներկայացնող Անգելինա Մանասյանը:
Ամփոփելով գեղեցկության մրցույթը Համահայկական խաղերի համաշխարհային կոմիտեի անդամ Պերճ Հալաջյանը նշեց, որ մրցույթի մասնակիցների 60-70 տոկոսը չէր տիրապետում հայերենին, սակայն նրանք խոստացել են անպայման սովորել և հաջորդ խաղերին մայրենի լեզվով հաղորդակցվել: