ԵՐԵՎԱՆ, 12 օգոստոսի — Sputnik, Արմենուհի Մխոյան. Գյումրու «Sasstex» գործարանի համասեփականատեր շվեյցարահայ գործարար Վարդան Սիրմաքեշը իր աշխատակիցների բողոքի ակցիաներին հանգիստ է վերաբերվում ու նորմալ է համարում նման գործընթացները։
«Աշխարհի բոլոր երկրներում էլ գործատու-աշխատակից հարաբերություններում կոնֆլիկտներ կան, ու Հայաստանը բացառություն չէ: Ես ապրում են Շվեյցարիայում և կարող եմ ասել, որ Շվեյցարիայում, Ֆրանսիայում ամեն օր նման կոնֆլիկտներ են լինում: Լինում են, հետո հարթվում են: Գործարանի համասեփականատեր Քրիստիան Գելեջիից ես իմացել եմ, որ այդ կանայք կարի հատուկ տեխնոլոգիային չեն տիրապետել: Նա նրանց սովորեցրել է, գումար է վճարել: Հետո այցելել եմ գործարան, տեսա, որ այնտեղ 60 հոգի աշխատում են, որևէ խնդիր չկա։ Նրանք բողոքներ չունեն»,- Մարալիկում լրագրողների հետ զրույցում ասաց Վարդան Սիրմաքեշը՝ հավելելով, որ կանայք լրագրողների պես «իրեն վրա չտվեցին»:
Ըստ ներդրողի «Sasstex»-ում ամեն ինչ նորմալ է, իսկ նրանք, ովքեր կարծում են, որ իրենց իրավունքները խախտվել են, կարող են դիմել դատարան: «Այստեղ օրենքներ կան, ու եթե իսկապես կարծում են, որ խախտումներ են եղել, թող դատի տան: Ես անելիք չունեմ: Գործարանը ղեկավարվում է Քրիստիան Գելեջիի կողմից, ու ես չեմ ուզում խառնվել»,-նշեց Վարդան Սիրմաքեշը:
Կանայք կրկին խաբվածի դերում են. Sasstex-ի ղեկավարությունը չկատարեց խոստումը
Հիշեցնենք, որ ավելի քան մեկ ամիս գործարանի ընկերության աշխատակազմը գործադուլ էր անում՝ բողոքելով աշխատավարձի չափերից ու ստեղծված պայմաններից: Տնօրինությունն էլ իր հերթին բողոքում էր աշխատանքի որակից: Այս պահին 150 աշխատակցից 60 է աշխատում, մյուսներն, ըստ գործարանի պատասխանատուների, արձակուրդում են:
Sputnik Արմենիայի ունեցած տեղեկություններով` 150 աշխատակցից 70-ը, հատկապես նրանք, ովքեր առավել ակտիվ էին և մշտապես իրենց բողոքն էին ներկայացնում լրատվամիջոցներին կամ մարզային կառույցներին, աշխատանքից ազատվել են: