ԵՐԵՎԱՆ, 9 օգոստոսի — Sputnik. Ոստիկանները բացահայտել են Սևանի թերակղզում գտնվող ռեստորանային համալիրներից մեկում 500 եվրո անվանական արժեքով կեղծ թղթադրամ իրացնելու դեպք։ Այս մասին հայտնում է ՀՀ ոստիկանությունը։
«Կեղծ թղթադրամ իրացնելու դեպքի առնչությամբ հայտնաբերվել ու բերման են ենթարկվել անձինք։ Հարուցված քրեական գործի շրջանակներում խուզարկություններ են կատարվել։ Բերման ենթարկվածներից մեկի բնակարանում հայտնաբերվել են ծխախոտի տուփերով մարիխուանայի նմանվող զանգվածներ, ինչպես և ատրճանակ»,–նշված է ոստիկանության հաղորդագրության մեջ։
Հարուցված քրգործով մեկ անձ կալանավորվել է։ Օպերատիվ-հետախուզական միջոցառումներն ու քննչական գործողությունները շարունակվում են։