Քաղաքագետի խոսքով` վարչապետը խոստումները ձևակերպումներ են, որ գեղեցիկ են հնչում, բայց որևէ գործիքակազմ նա չունի դրանք իրագործելու համար, այլ ճիշտ հակառակը։ «Այս տարվա 1–ին 3 ամսվա ընթացքում արտագաղթը Հայաստանից ավելի քան 2 անգամ ավելացել է, մարդիկ ի վերջո հասկանալու են, որ նա չի կարողանում լուծել մարդկանց խնդիրները և, չլուծելով դրանք, փորձում է մարդկանց տրանսի մեջ գցել, երազներով կերակրել, իսկ վերջում ժողովուրդը երազախաբության մեջ է հայտնվելու և սկսելու մեղադրել նույն վարչապետին»,–ասում է Բոզոյանը։
Քաղաքագետն Արցախի թեմայով ցանկացած շահարկում անբարոյականություն է համարում։
«Ազգային հարցերի շուրջ սպեկուլյացիաներն անթույլատրելի են։ Դա շատ էմոցիոնալ խնդիր է, այն կարող է ազդել ցանկացած մարդու վրա»,–նշում է Բոզոյանը։
Քաղաքագետի խոսքով` վարչապետի արցախյան ելույթը սպեկուլյացիայի էլեմենտներ ուներ. Հայաստանում և Արցախում բոլորն են հասկանում, որ Արցախը չի կարող լինել Ադրբեջանի կազմում։ Դա ժամանակակից աշխարհում դժվար, բայց լուծելի խնդիր է։
«Ավելի լավ է Փաշինյանն ամեն ինչ անի, որ բանակցային գործընթացում Հայաստանի դիրքերը գոնե չթուլանան։ Այս մեկ ու կես տարվա ընթացքում հակառակը եղավ, որովհետև ինքը պոպուլիստ է, և ամեն ինչ անում է միայն բոլորին դուր գալու համար»,–ընդգծում է Բոզոյանը։
Երվանդ Բոզոյանի խոսքով` պետք է իրատեսական ծրագիր ունենանք Արցախի հարցում, որպեսզի այն կայանա որպես անկախ պետություն։ Հետո Արցախը կմնա որպես անկախ պետություն, թե կմիանա Հայաստանին` դա արդեն ժամանակի հարց կլինի։
Հիշեցնենք, որ հուլիսի 5–ին Ստեփանակերտի իր ելույթում Նիկոլ Փաշինյանը թվարկել էր այն խոշոր խնդիրներն ու մարտահրավերները, որոնք Հայաստանը պետք է լուծի մինչև 2050 թվականը: Վարչապետն ընդգծել էր, որ չի հիշատակում Արցախը, քանի որ «Արցախը Հայաստանն է, և վերջ»։