Իրավագետ Հայկ Արամյանը Sputnik Արմենիայի հետ զրույցում խոսել է ճանապարհատրանսպորտային պատահարների և դրանց կանխարգելման նպատակով իրականացվող աշխատանքների արդյունավետության մասին։ Ըստ Արամյանի՝ այսօր ճանապարհատրանսպորտային պատահարների կանխարգելման ուղղությամբ կառավարության պետական միջոցառումները արդյունավետ համարել չի կարելի, քանի որ վթարների թիվը բավականին մեծ է։
«Արդյունավետությունը պետք է չափել արդյունքներով, իսկ մենք տեսնում ենք, որ այս պահի դրությամբ վիճակագրությունը լավ արդյունքի մասին չի խոսում»,–նշում է Արամյանը։
Նա հավելում է, որ 2018 թվականի ընթացքում գրանցվել է մոտ 6000 ճանապարհատրանսպորտային պատահար, զոհվել է 343 քաղաքացի, և դա մտահոգիչ ցուցանիշ է։
«Նախ պետք է վերլուծել ճանապարհատրանսպորտային պատահարների կառուցվածքը`ինչ պատճառներով են դրանք հաճախ տեղի ունենում, որոնց հետևանքով ունենում ենք զոհեր»,-ասում է իրավագետը։
Հայկ Արամյանը կարծում է, որ ճանապարհատրանսպորտային պատահարների հիմնական պատճառը սահմանված արագության գերազանցումն է։
«Մեր կառավարության վարած քաղաքականությունն այս հարցում արդյունավետ չի եղել. պաշտոնական տվյալների համաձայն տեղադրել ենք 232 արագաչափ սարք, սակայն դրանք չեն երաշխավորում, որ վարորդը կպահպանի սահմանված արագությունը»,–ասում է Արամյանը, հավելելով, որ ճանապարհատրանսպորտային մշակույթի մեջ պետք է ներմուծել նոր գաղափար`միջին արագություն։
Միջին արագությունը չափող սարքերը նկարահանում են մեքենան մի հատվածից մյուս հատված հասնելիս և հաշվում ժամանակը։ Խախտում է արձանագրվում, եթե միջին արագությունը թույլատրվածից բարձր է լինում։