ԵՐԵՎԱՆ, 24 հուլիսի — Sputnik. ՀՀ երկրորդ նախագահ Ռոբերտ Քոչարյանն այսօր վերաքննիչ դատարանի նիստի ժամանակ պահանջել է քննչական մարմիններից վերադարձել իր մոտից առգրավված մի քանի միավոր զենքը։ Նշենք, որ այսօր Վերաքննիչ դատարանը քննարկում է դատախազության բողոքը` Ռոբերտ Քոչարյանի ունեցվածքից կալանքը մասամբ հանելու գործով։
Նիստի ընթացքում քննարկվել է նաև Քոչարյանից առգրավված մի քանի միավոր անվանական զենքի վերադարձի հարցը։ Քոչարյանի խոսքով` դեռ անցած տարի, երբ նրան առաջին անգամ ազատ էին արձակել, նա երկու անգամ փաստաբանների ներկայությամբ պահանջել է քննիչից վերադարձնել իր անվանական զենքը։
«Այդ զենքերը բոլորը ստուգված են եղել, այդ բոլոր զենքերի կրակած պարկուճը ոստիկանությունում կա, օրինական զենքեր էին, և այստեղ չկար որևէ զենք, որն օգտագործված է եղել մարտի մեկի ժամանակ, կամ ինչ–որ տեսակի զենք, որը կարող էին ենթադրել, որ մարտի մեկի հետ կապ ունի»,–հայտարարեց Քոչարյանը։
Նշենք` Ռոբերտ Քոչարյանի բանկային հաշվի և ունեցվածքի վրա կալանք է դրվել 2018 թվականի հուլիսի 30–ին` Մարտի 1–ի գործով մեղադրանքը ներկայացնելուց չորս օր անց։ Այս տարվա հունիսի 7–ին Երևանի ընդհանուր իրավասության դատարանը Աննա Դանիբեկյանի գլխավորությամբ որոշում է կայացրել մասամբ բավարարել Քոչարյանի պաշտպանության միջնորդագիրը` նախկին նախագահի ունեցվածքից կալանքը հանելու համար, քանի որ փաստաբանները նրա իրավունքների խախտում էին գրանցել։
Հիշեցնենք, որ 2018 թվականի հուլիսի 30-ին, Քոչարյանին մեղադրանք առաջադրելուց 4 օր անց, կալանք է դրվել նրա՝ ինչպես գույքի, այնպես էլ բանկային հաշիվների վրա:
Ռոբերտ Քոչարյանի գործի մասին տեսակետը շուտ չի լինի. մանրամասնում է Վարդևանյանը
Հունիսի 7-ին Երևան քաղաքի ընդհանուր իրավասության դատարանի Շենգավիթի նստավայրում դատավոր Աննա Դանիբեկյանն արձանագրել էր, որ քննիչի որոշմամբ ՀՀ երկրորդ նախագահի գույքի վրա կալանք դնելու արդյունքում նրա իրավունքները խախտվել են։ Դատավորը, սակայն, այդ որոշումն ուժի մեջ թողեց` դրա քննությունը թողնելով բուն քրեական գործը քննող դատավորի վրա։